პოლიტიკა

ის, რომ 23-ე ადგილიდან მე-16 ადგილზე გადავინაცვლეთ ჩვენი მთავრობის რეფორმების ინერციის შედეგია - ზურაბ ჭიაბერაშვილი

2012 წელს მე-8 ადგილზე ვიყავით და ახლა უნდა გვიხაროდეს, რომ მე-16 ადგილზე ვართ? - ასე გამოეხმაურა ნაციონალური მოძრაობის წევრი ზურაბ ჭიაბერაშვილი ბიზნესის კეთების კუთხით მსოფლიო ბანკის რეიტინგში საქართველოს პოზიციის გაუმჯობესებას.

როგორც ჭიაბერაშვილმა ჟურნალისტებთან საუბრისას აღნიშნა, 23-დან მე-16 ადგილზე გადმონაცვლებაც წინა მთავრობის რეფორმების ინერციის შედეგია.

,,ივანიშვილის მთავრობის მავნებლური პოლიტიკის შედეგად, პირველ ათეულში ადგილი დავკარგეთ. შეგახსენებთ, 2012 წელს მე-8 ადგილზე ვიყავით და ახლა უნდა გვიხაროდეს, რომ მე-16 ადგილზე ვართ? სამწუხაროდ, 2012 წელთან შედარებით უკან ვართ და ივანიშვილის მთავრობის პირობებში პროგრესიც არაა მოსალოდნელი. ის, რომ 23-ე ადგილიდან მე-16 ადგილზე გადავინაცვლეთ, ესეც ჩვენი მთავრობის რეფორმების ინერციის შედეგია. მსოფლიოში პირველი რეფორმატორი ქვეყნის იმიჯი დავკარგეთ, რაც საინვესტიციო მიმზიდველობას ზრდიდა. ამას ეჭირა ლარიც და ეკონომიკა წინ მიდიოდა. ეს ნიშნავს, რომ ქვეყანაში გვაქვს ეკონომიკური კრიზისი და ინვესტიციები საკმარისი რაოდენობით არ შემოდის”, - განაცხადა ზურაბ ჭიაბერაშვილმა.

მარი ნამგალაძე