საზოგადოება

ხელისუფლებამ უნდა შეძლოს, აღიაროს, რომ ცოდვა ჩაიდინა ციანიდის საქმესთან მიმართებით - მეუფე პეტრე ცაავა

ჭყონდიდელმა მიტროპოლიტმა, მეუფე პეტრემ მოუწოდა ხელისუფლებას, აღიაროს, რომ „ცოდვა ჩაიდინა ციანიდის საქმესთან მიმართებით“. ამის შესახებ მეუფე პეტრე ცაავამ სინოდის სხდომის დასრულების შემდეგ ისაუბრა.

მისივე თქმით, წმინდა სინოდის სხდომაზე „ციანიდის საქმე“ ზოგადად განიხილეს.

„ეს საკითხი ზოგადად იყო განხილული, კონკრეტულად არა. განხილული იყო იმ კონტექსტში, რომ ხელისუფლებამ უნდა შეძლოს, აღიაროს, რომ ცოდვა ჩაიდინა ციანიდის საქმესთან მიმართებით“, – უთხრა ჟურნალისტებს მეუფე პეტრემ.

კითხვაზე, დაუშვა თუ არა შეცდომა ხელისუფლებამ, მეუფემ აღნიშნა, რომ „ეს იყო ბოროტება და უნდა მოინანიოს“.

ცნობისთვის, თბილისის საქალაქო სასამართლომ პატრიარქის მდივან-რეფერენტის, შორენა თეთრუაშვილის შურისძიების მოტივით მკვლელობის მომზადებისთვის დეკანოზ გიორგი მამალაძეს 9 წლით თავისუფლების აღკვეთა მიუსაჯა. აღნიშნული გადაწყვეტილება სააპელაციო სასამართლომაც ძალაში დატოვა.