სამართალი
ხორავას ქუჩაზე მკვლელობის საქმეზე ბრალდების მხარემ დასკვნითი სიტყვა წარმოთქვა
თბილისში, ხორავას ქუჩაზე მოზარდების მკვლელობის საქმეზე ბრალდების მხარემ თბილისის საქალაქო სასამართლოში მიმდინარე პროცესზე დასკვნითი სიტყვა წარმოთქვა.
საკუთარ დასკვნით სიტყვაში პროკურატურამ ყურადღება გაამახვილა იმ მტკიცებულებებზე, რაც მათ საქმის არსებითი განხილვის ფარგლებში გამოიკვლიეს, მათ შორის, მოწმეების ჩვენებები.
ბრალდების მხარე ორივე არასრულწლოვნის მიმართ გამამტყუნებელი განაჩენის გამოტანას ითხოვს.
„მიმოვიხილეთ ყველა მტკიცებულება, მოვახდინეთ მათი შეფასება და ანალიზი. ასევე, გავაბათილეთ ექსპერტიზის დასკვნა. ჩვენი მოთხოვნა დამნაშავედ ცნობაა. გვაქვს ყველა მტკიცებულება, რაც მათ მიერ ჩადენილ დანაშაულს ადასტურებს“, – განაცხადა საქმის პროკურორმა მარიკა გოცირიძემ.
დაცვის მხარის შეფასებით კი, პროკურატურის დასკვნითი სიტყვა დაუსაბუთებელი იყო.
„ბრალდების დასკვნითი სიტყვა დაუსაბუთებელი იყო. დაცვის მხარის დასკვნით სიტყვაში გავაბათილებთ მათ არგუმენტაციას. ჩვენ დეტალურად მიმოვიხილავთ ყველა გარემოებას. ბრალდების მხარემ მოწმეების ჩვენებები დამახინჯებული ფორმით მოიყვანა და ჩვენ მათ ბრალდებას გავაბათილებთ. თუ ბრალდება ერთი მოწმის ჩვენებას ეყრდნობა, რომელმაც შეცვალა ჩვენება, მაშინ, რა თქმა უნდა, მათი სასარგებლო განაჩენი იქნება, მაგრამ როგორ შეიძლება ვენდოთ მოწმეს, რომელიც რამდენჯერმე ცვლის ჩვენებას“, – განაცხადა ერთ-ერთი ბრალდებულის ადვოკატმა ტარიელ კაკაბაძემ.
ამჟამად დასკვნითი სიტყვას სწორედ დაცვის მხარე წარმოთქვამს.