პოლიტიკა

ხორავას ქუჩაზე მკვლელობის საქმეზე შექმნილ საპარლამენტო საგამოძიებო კომისიაში უმრავლესობის 5 წევრი შევა

საპარლამენტო საგამოძიებო 17-კაციან კომისიაში, რომელიც შეიქმნა ხორავას ქუჩაზე მოზარდების მკვლელობის საქმესთან დაკავშირებით, სავარაუდოდ, საპარლამენტო უმრავლესობის 5 დეპუტატი იქნება წარმოდგენილი.

ამ ეტაპზე ცნობილია, რომ უმრავლესობიდან საგამოძიებო კომისიაში შევლენ შემდეგი დეპუტატები: არჩილ თალაკვაძე, ეკა ბესელია, სოფო კილაძე და მამუკა მდინარაძე. მიმდინარეობს კონსულტაციები კიდევ ერთი წევრის შერჩევის საკითხზე.

კომისიაში შესვლაზე უარი განაცხადა „ნაციონალურმა მოძრაობამ“, ხოლო ფრაქცია „საქართველოს პატრიოტებს“ ერთის ნაცვლად, ორი ადგილი შესთავაზეს. კიდევ ერთი ადგილი განსაზღვრულია პარლამენტის დამოუკიდებელი დეპუტატისთვის. იმ შემთხვევაში, თუკი კომისიაში არც ეს სუბიექტები შევლენ და თავისუფალი ადგილი დარჩება, მას “ქართული ოცნება“ შეავსებს.

კონსულტაციები კომისიის დაკომპლექტების შესახებ 16 საათამდე გაგრძელდება.

ცნობილია, რომ საგამოძიებო კომისიას უხელმძღვანელებს პარლამენტის ვიცე-სპიკერი, „ევროპული საქართველოს“ წევრი სერგი კაპანაძე. სულ „ვეროპული საქართველო“ კომისიაში 9 წევრით იქნება წარმოდგენილი. სერგი კაპანაძის გარდა იქ შევლენ ოთარ კახიძე, ელენე ხოშტარია, ირაკლი აბესაძე, სერგო რატიანი, ირმა ნადირაშვილი, ხათუნა გოგორიშვილი, მამუკა ჩიქოვანი და გიგა ბოკერია.