პოლიტიკა

ხორავას ქუჩის საქმის მტკიცებულებები გვაძლევს საფუძველს, რომ კომისიის რეკომენდაციებს დავეთანხმოთ - ნესტან ლონდარიძე

ხორავას ქუჩაზე მოკლული დავით სარალიძის მამის, ზაზა სარალიძის ადვოკატმა ნესტან ლონდარიძემ განაცხადა, რომ ეთანხმება აღნიშნული საქმის შემსწავლელი დროებითი საპარლამენტო საგამოძიებო კომისიის რეკომენდაციების შინაარსს.

უფლებადამცველმა აღნიშნა, რომ საჭიროა გამოძიების დაწყება ინციდენტში დაჭრილი პირის მიმართ.

„გავეცანით ამ რეკომენდაციების შინაარსს და ვეთანხმებით. აქ ძირითადად დასმულია ის საკითხები, რომლებიც გამოძიებას უნდა გაეკეთებინა. ის რეკომენდაციები, რაც წარმოგვიდგინეს, უნდა შესრულებულიყო. საქმის მტკიცებულებები გვაძლევს საფუძველს, რომ კომისიის რეკომენდაციებს დავეთანხმოთ.

მნიშვნელოვანია, დაიწყოს გამოძიება იმ პიროვნების მიმართ, რომელსაც ცნობილია, რომ აქვს ჭრილობა მიყენებული და დღემდე ამ კუთხით არანაირი ქმედითი ნაბიჯები არ არის გადადგმული. უფრო მეტიც, როდესაც ჩვენ ვკითხულობთ, არის თუ არა ამ ნაწილში გამოყოფილი საქმე და მიმდინარეობს თუ არა ძიება, პასუხი არის ასეთი, რომ საქმე გამოყოფილი არის მოწმეებზე ზემოქმედებისა და შეუტყობინებლობის კუთხით.

რაც შეეხება მეორე რეკომენდაციას, დიდი ალბათობით, მ.კ-მ უფრო რთული როლი შეასრულა ამ საქმეში, ვიდრე ჩვენ დაზარალებული მხარე მუდმივად ვაპელირებთ, იმდენად სრულად არის ორივე რეკომენდაცია დასაბუთებული, რომ ჩვენ მხარს ვიჭერთ მის დამტკიცებას“, -თქვა ლონდარიძემ.

დღეს ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისიის წევრები არასამთავრობო ორგანიზაციებისა და სახალხო დამცველის აპარატის წევრებს შეხვდნენ. განიხილეს ორი რეკომენდაცია, ერთი ეხება ერთ-ერთი არასრულწლოვანის, გ.მ-ს დაჭრის ფაქტზე გამოძიების დაწყებას და ასევე კონფლიქტში მონაწილე მ.კ-ს მიმართ სისხლის სამართლებრივი დევნის დაწყებას.