პოლიტიკა

კიდევ ერთხელ მოვუწოდებ პროკურატურას, რომ მაჩალიკაშვილის ოჯახს მიაწოდოს ინფორმაცია გამოძიების მიმდინარეობის თაობაზე - ნინო ლომჯარია

სახალხო დამცველმა ნინო ლომჯარიამ მოუწოდა პროკურატურას, თემირლან მაჩალიკაშვილის ოჯახს მიმდინარე გამოძიების შესახებ ინფორმაცია მიაწოდოს.

სახალხო დამცველმა ხაზი გაუსვა, რომ პანკისის ხეობაში ჩატარებული სპეცოპერაციის შემდეგ ერთ წელი გავიდა, თუმცა არანაირი ინფორმაცია არ არის გამოძიების მიმდინარეობის ან შედეგების შესახებ.

„კიდევ ერთხელ მინდა მივუსამძიმრო გარდაცვლილის ოჯახს. როდესაც შარშან ეს ფაქტი მოხდა, მეც გავაკეთე განცხადება, რომ დროულად უნდა ჩატარებულიყო გამოძიება. თუმცა, მიუხედავად იმისა, რომ ერთი წელია გასული, არ გვაქვს არანაირი ინფორმაცია გამოძიების მიმდინარეობის ან შედეგების შესახებ, რაც შეეხება უშუალოდ გარდაცვალების გარემოებებს. სამწუხაროდ, ჩვენი მოთხოვნის მიუხედავად, პროკურატურამ არ მოგვცა წვდომა მიმდინარე გამოძიების მასალებზე. კიდევ ვფიქრობთ, უკვე საკმარისი დრო იყო იმისათვის, რომ ამ კითხვებს გასცეს დასაბუთებული, არგუმენტირებული პასუხი და კიდევ ერთხელ მოვუწოდებ პროკურატურას, რომ , უპირველეს ყოვლისა, ოჯახს მიაწოდოს ინფორმაცია გამოძიების მიმდინარეობის თაობაზე", - განაცხადა ლომჯარიამ.

ცნობისთვის, სპეცოპერაციისას 19 წლის თემირლან მაჩალიკაშვილი თავის არეში დაიჭრა. იგი 10 იანვარს წმინდა მიქაელ მთავარანგელოზის სახელობის მრავალპროფილიან კლინიკურ საავადმყოფოში გარდაიცვალა. თემირლან მაჩალიკაშვილის მამა, მალხაზ მაჩალიკაშვილი მომხდარს დღემდე აპროტესტებს. ის დამნაშავეების დასჯას ითხოვს.