პოლიტიკა
ლევან ხაბეიშვილის განცხადებით, ის სუს-ის თანამშრომლებმა სცემეს
„ერთიანი ნაციონალური მოძრაობის“ წევრის, ლევან ხაბეიშვილის ინფორმაციით, მას სამართალდამაცავეებმა სცემეს. ამის შესახებ მან რუსთავი 2-ის პირდაპირ ეთერში განაცხადა.
„მომეპარნენ სუს-ის თანამშრომლები აქციიდან. როცა მერიის შენობაში შევყავდი, იძახოდნენ, დავსაჯოთ, დავსაჯოთ და ბიძინა ივანიშვილის ის ტიტუშკები, რომლებიც შიგნით იყვნენ, საპატრულო პოლიციის წინ ვინც იდგნენ, ფიზიკურად გამისწორდნენ . მათ შორის თავში, მგონი, მეტყობა სისხლჩაქცევები, ასევე გვერდში“, - თქვა ხაბეიშვილმა.
ხაბეიშვილის ვარაუდით, ის პირები, ვინც მას სცემდნენ, სამოქალაქო სამოსში გადაცმული სუს-ის თანამშრომლები იყვნენ.
დედაქალაქის მერიასთან ამ დრომდე დაძაბულობაა. „ერთიანი ნაციონალური მოძრაობის“ წევრები დავით ნარმანიასთან 4-კაციანი დელეგაციის თბილისის მერიაში შეყვანას ითხოვენ. მერიას პასუხი ჯერჯერობით არ გაუცია. მერიასთან გაძლიერებულია პოლიცია.
რამდენჯერმე სიტუაცია დაიძაბა პოლიციასა და აქციის მონაწილეებს შორის. სამართალდამცავეებმა ენმ-ის მხარდამჭერები გზის სავალ ნაწილზე გადაიყვანეს. შემდგომ იმის გამო, რომ ამ გადაწყვეტილებამ შარტავას ქუჩის გადაკეტვა გამოიწვია, პოლიციამ ძალის გამოყენებით დაატოვებინა აქციის მონაწილეებს გზა.
შეგახსენებთ, აქცია 2 საათზე დაიწყო. ენმ მის მხარდამჭერებთან ერთად აპროტესტებს თბილისის საკრებულოს 29 სექტემებრის გადაწყვეტილებას, რომლის თანახმად ბიძინა ივანიშვილს პუშკინის სკვერთან და თაბორის მთაზე მიწის ნაკვეთები გადაეცა.
ანა მებურიშვილი