კომენტარი

მანამ იქნებიან შიდა გაუგებრობებში, სანამ ივანიშვილი თითს არ დაუქნევს მათ - რომან გოცირიძე

„ნაციონალური მოძრაობის“ ფრაქციის თავმჯდომარე რომან გოცირიძე ამბობს, რომ გიორგი კვირიკაშვილსა და კახა კალაძეს შორის ფარული ომია.

,,პარლამენტში მომხდარ ოცნების შიდა დაპირისპირებაში არ არსებობს ფრონტის ხაზი: აქეთ ერთი მხარე და იქით მეორე, აქეთ ბნელები და იქეთ ნათელები, აქეთ შავები და იქით თეთრები – ასე არ არის. ვითარება საკმაოდ აწეწილია და ჩახლართული. უამრავი შემადგენელი აქვს ამ განხეთქილებას“, – ასე ეხმაურება მმართველ გუნდში არსებულ დაპირისპირებას ფრაქცია ,,ნაციონალური მოძრაობის“ თავმჯდომარე, რომან გოცირიძე.

მისი თქმით, არსებულ განხეთქილებაში რამდენიმე შემადგენლობამ იჩინა თავი. გოცირიძე განსაკუთრებულ აქცენტს კვირიკაშვილი-კალაძის ფარულ ომზე აკეთებს.

“კვირიკაშვილ-კალაძის ფარული ომია. ერთმანეთის წინააღმდეგ არიან შედარებით ლიბერალური ორიენტაციის ახლები და კონსერვატიული ძველები; ყველა დაჯგუფებაში მიმოფანტული ორთოდოქსები და ამავე ჯგუფებში მყოფი შედარებით საღად მოაზროვნეები; მართვის სათავეში მყოფები, შესაბამისი პრივილეგიებით და ერთ დროს გავლენიანი გვერდზე ჩაჩოჩებულები; ჩუმი ინტრიგანები და წამქეზებლები; პასიურები და აქტიურები; ფულიანი მაჟორიტარები და უფულო სიით გადეპუტატებულები; ივანიშვილთან შედარებით ახლო ორბიტაზე მყოფები და დიდ წრეზე მოძრავები, სადაც მზე ვერ წვდება და მუდმივად ჩრდილია; თანამდებობიანი ქალები და შევიწროვებული კაცები; რუსოფილები და დასავლეთზე ორიენტირებულები; ბრიყვები და გონიერები; შავტოიოტიანები და უტოიოტოები; მომნანიებლები და არამომნანიებლები (საზმაუს კენჭისყრის საქმეში); კიდევ მრავალი სხვა ნიშნის მატარებლები. და მანამ იქნებიან შიდა გაუგებრობებში, სანამ ივანიშვილი თითს არ დაუქნევს მათ. ვნახოთ, სადამდე მიუშვებს მებრძოლ მხარეებს დე ფაქტო მმართველი“, - აცხადებს გოცირიძე.