პოლიტიკა

„მაუწყებლის შესახებ“ კანონზე პრეზიდენტი დღეს შეხვედრას გამართავს

დღეს საქართველოს პრეზიდენტი გიორგი მარგველაშვილი მედიის, არასამთავრობო სექტორისა და საკითხით დაინტერესებული მხარეების წარმომადგენლებს შეხვდება „მაუწყებლის შესახებ“ კანონზე სალაპარაკოდ.

პრეზიდენტის საპარლამენტო მდივნის, ანა დოლიძის განცხადებით, საკანონმდებლო ცვლილებები ეხება მნიშვნელოვან საკითხს- მედიასა და ობიექტურის მაუწყებლის შენარჩუნებას.

„ამასთან დაკავშირებით, საზოგადოებაში გამოითქვა ბევრი კრიტიკა და შენიშვნა, ამიტომ საქართველოს პრეზიდენტი აპირებს, შეხვდეს ყველა იმ მხარეს, რომლებმაც ეს მოსაზრებები გამოთქვეს: მედიისა და არასამთავრობო სექტორის წარმომადგენლებს, რათა ჩამოვყალიბდეთ იმ კრიტიკულ, ან ნაკლებად კრიტიკულ ასპექტებზე, რომლებსაც პარლამენტი იხილავს“,-თქვა ანა დოლიძემ, რომლის განცხადება პრეზიდენტის ადმინისტრაციის პრესსამსახურმა გაავრცელა.

საქართველოს პარლამენტმა „მაუწყებლობის შესახებ“ საკანონმდებლო პაკეტი მეორე მოსმენით 85 მომხრე ხმით, 6-ის წინააღმდეგ 14 დეკემბერს დაამტკიცა. საკანონმდებლო ცვლილებები ითვალისწინებს მაუწყებლისთვის უფლებამოსილების გაფართოებას, არხზე კომერციული რეკლამის განთავსების შესაძლებლობას, ოღონდ შეზღუდვა ვრცელდება პრაიმ ტაიმზე (19-დან 24 საათამდე).

საკანონმდებლო ცვლილებებით ერთმანეთს ემიჯნება საზოგადოებრივი მაუწყებლის მენეჯმენტისა და სამეურვე საბჭოს უფლებამოსილებები.