პოლიტიკა

მიხეილ სააკაშვილი 2008 წლის აგვისტოს ომისთვის უნდა დაისაჯოს - ნინო ბურჯანაძე

საქართველოს პარლამენტის ყოფილი სპიკერის, ნინო ბურჯანაძის განცხადებით, საქართველოს ექს-პრეზიდენტი მიხეილ სააკაშვილი უნდა დაისაჯოს 2008 წლის აგვისტოს ომის გაჩაღებისთვის, რის შემდეგ შესაძლებელი იქნება აფხაზებთან და ოსებთან ურთიერთობების დალაგება. 2008 წლის ომზე ბურჯანაძე რუსულ გამოცემა РИА Новости-ის ესაუბრა.

„სააკაშვილის შეშლილი მოქმედებები 2008 წლის აგვისტოში, ყველა ერისთვის სახელმწიფო და ადამიანური ტრაგედიის მიზეზი გახდა. დარწმუნებული ვარ, რომ ის დამნაშავეა და უნდა დაისაჯოს. თუ გვინდა აფხაზებთან და ოსებთან ურთიერთობების აღდგენა, ისინი უნდა ხვდებოდნენ, რომ ნებისმიერი ასეთი პროვოკაცია და ტრაგიკული შეცდომა დაისჯება და მხოლოდ ამ შემთხვევაში იქნება აღდგენილი ნდობის ხიდები. ზუსტად ამიტომ მე ვითხოვდი, რომ საქართველოს მმართველ ხელისუფლებას აღედგინა სამართლიანობა და საქმე აღეძრა არა სააკაშვილის პიჯაკებზე, არამედ აგვისტოს მოვლენებზე“, -განაცხადა ბურჯანაძემ.

მისივე თქმით, სააკაშვილს ომისკენ აშშ-მ უბიძგა, რადგან „ის იყო დარწმუნებული, რომ აშშ და კერძოდ, ბუში ჰაერში გამანადგურებლებს აწევდნენ და დაბომბავდნენ რუსულ ჯარებს“.

„სააკაშვილს რომ ჩემთვის მოესმინა, მაშინ, რა თქმა უნდა, ომის თავიდან აცილება შესაძლებელი იქნებოდა. დიახ, ორივე მხრიდან ყოველთვის იყო პროვოკაციები, მაგრამ პირდაპირ სამხედრო დაპირისპირებამდე საქმე არასდროს არ მიდიოდა. ყველაზე საშინელია, რომ ამ ტრაგედიის შემდეგ ჩვენ რეალურად ვერ წავიწიეთ წინ აღნიშნული კონფლიქტის დარეგულირებისკენ“, -თქვა ბურჯანაძემ.