საზოგადოება

მივმართავ ბატონ კალაძეს, შეაჩეროს მშენებლობა, რომელიც გაცამტვერებით გვემუქრება - ვაკის საცურაო აუზთან მცხოვრები მოსახლეობა კორპუსების მშენებლობას აპროტესტებს

თბილისში, ჭავჭავაძის გამზირზე, ვაკის საცურაო აუზთან მცხოვრები მოსახლეობა სამი 40-სართულიანი კორპუსის მშენებლობას აპროტესტებს.

ადგილობრივების თქმით, მიმდებარე ტერიტორია საკმაოდ მცირეა და ამხელა დატვირთვას ვერ გაუძლებს. მათი განმარტებით, ინფრასტრუქტურა მსგავს მაღალსართულიან შენობებზე გათვალისწინებული არ არის, რის გამოც მშენებლობა დაუშვებელია.

„მე მივმართავ ბატონ კახი კალაძეს, შეაჩეროს ეს მშენებლობა, რომელიც ჩვენ გაცამტვერებით გვემუქრება“, - განაცხადა აქციის ერთ-ერთმა მონაწილემ, ზაირა სარიშვილმა.

მშენებლობის დროებით შეჩერების მოთხოვნით მოსახლეობამ მერიას მიმართა. პასუხად რამდენიმეთვიანი ლოდინის შემდეგ მშენებლობის შეჩერებაზე უარი მიიღო.

ადვოკატი დიმიტრი გაბუნიას ინფორმაციით, მოსახლეობა სარჩელს შეიტანს თბილისის საქალაქო სასამართლოში.

„მომზადებული გვაქვს სარჩელი, რომელიც რამდენიმე დღეში შევა საქალაქო სასამართლოში მოვითხოვთ მშენებლობის შეჩერებას“, -აღნიშნა უფლებადამცველმა.

ადგილობრივები მერიასთან აქციებსაც აანონსებსენ.