საზოგადოება

მხოლოდ რეგულაციებით ასეთ ტრაგედიებს თავიდან ვერ ავიცილებთ - მიხეილ გიორგაძე გომბორის უღელტეხილზე მომხდარ ავარიაზე

საქართველოს კულტურისა და სპორტის მინისტრი მიხეილ გიორგაძე გამოეხმაურა გომბორის უღელტეხილზე მომხდარ ავტოავარიას, რომლის შედეგად 4 ადამიანი დაიღუპა.

გიორგაძის თქმით, რამდენიმე წლის წინ სამინისტროებმა გაატარეს ზომები ბავშვების ტრანსპორტით გადაადგილების დასარეგულირებლად, რათა მსგავსი შემთხვევები მინიმუმდე ყოფილიყო დაყვანილი.

„თქვენ გახსოვთ ის ტრაგედია, რომელიც ქობულეთში რამდენიმე წლის წინ მოხდა. სწორედ ამ ტრაგედიის შემდეგ, კულტურის, სპორტის სამინისტრომ, შინაგან საქმეთა სამინისტრომ, ჯანდაცვის სამინისტრომ შეიმუშავეს ძალიან მკაფიო რეგულაციები, რომელიც ეხებოდა ბავშვების ტრანსპორტით გადაადგილებას; გამყოლებთან დაკავშირებული კრიტერიუმები იყო შემუშავებული, მოზარდების განთავსება, დაზღვევა, გამყოლების, მეთვალყურეებისა და მშობლების ურთიერთობის მოწესრიგება. ანუ ყველაფერი გავაკეთეთ იმისთვის, რომ მსგავსი ინცინდენტების შესაძლებლობა მინიმუმამდე დაგვეყვანა, თუმცა დამეთანხმებით, ალბათ, რომ რამდენი რეგულაციაც არ უნდა შევიმუშაოთ, როგორი ხისტი მოთხოვნებიც არ უნდა იყოს ამ რეგულაციების შესასრულებლად, თუ თითოეული ჩვენგანი მას არ შეასრულებს, თუ მშობელი არ მიაქცევს ყურადღებას იმას, რომ სამარშრუტო ტაქსში ორჯერ მეტი ბავშვი მგზავრობს, თუ მძღოლი ან სატრანსპორტო კომპანია ტრანსპორტის გამართულობას არ უზრუნველყოფს, თუ პედაგოგი, სკოლის დირექტორი ამ რეგულაციების ზედმიწევნით ზუსტად შესრულებას არ მიაქცევს ყურადღებას, მაშინ, რა თქმა უნდა, მხოლოდ რეგულაციებით ასეთ ტრაგედიებს თავიდან ვერ ავიცილებთ.

გამოსავალი არის იმ წესების დაცვა, რომელიც ამა თუ იმ სფეროშია შემუშავებული.

ვწუხვარ ამ ტრაგედიის გამო და ვუსამძიმრებ დაზარალებულების და დაღუპულების ოჯახებს“, - განაცხადა გიორგაძემ.

ცნობისთვის, 2 დღის წინ გომბორის მომხდარი ავტოავარიის შედეგად თბილისის 175-ე სკოლის ერთი მოსწავლე და სამი მშობელი დაიღუპა. ისინი კახეთში ექსკურსიაზე მიდიოდნენ.