საზოგადოება

„მკვლელები არ დასჯილან“ - ხორავას ქუჩის ტრაგედიის წლისთავზე ზაზა სარალიძემ და მისმა მხარდამჭერებმა მსვლელობა გამართეს

ხორავას ქუჩაზე მომხდარი მოზარდების მკვლელობიდან ერთი წელი გავიდა. ამასთან დაკავშირებით მოკლული დავით სარალიძის მამამ, ზაზა სარალიძემ მხარდამჭერებთან ერთად მსვლელობა გამართა პარლამენტიდან ხორავას ქუჩის მიმართულებით. მსვლელობის მონაწილეებს ეკავათ პლაკატები წარწერებით „მკვლელები არ დასჯილან“, „ორი ბავშვი მოკლეს!“.

მსვლელობის მონაწილეები 51-ე საჯარო სკოლასთან შეჩერდნენ. მათ სკოლის შენობასთან ლევან დადუნაშვილისა და დავით სარალიძის ფოტოები მიიტანეს და სანთლები დაანთეს.

ზაზა სარალიძემ ხელისუფლებას მოუწოდა, მისი შვილის მკვლელობაში დამნაშავე პირები დასაჯოს.

„პროკურატურამ და გამოძიებამ რაც არ უნდა იძახოს, რომ მომაკვდინებელი ჭრილობის ავტორი არ არის, მომაკვდინებელი ჭრილობა იყო 12-ვე ჩემთვის, ის 12 ჭრილობა, რომელიც მიაყენეს ჩემს შვილს, ყველა არის მკვლელი. ერთია მხოლოდ დაჭერილი, ორი დადის თავისუფლებაზე. სანამ ის ორი კიდევ ვინმეს იმსხვერპლებს, მანამ სჯობს, ხელისუფლება გონს მიეგოს და მისცეს პასუხისგებაში ყველა“, – განაცხადა ზაზა სარალიძემ.

მსვლელობა სოციალური ქსელით დაიგეგმა. ზაზა სარალიძესთან ერთად მასში მონაწილეობა მიიღო პანკისის ხეობაში ჩატარებული სპეცოპერაციის დროს მოკლული თემირლან მაჩალიკაშვილის მამამ, მალხაზ მაჩალიკაშვილმა.

2017 წლის 1-ელ დეკემბერს სკოლის მოსწავლეები, ლევან დადუნაშვილი და დავით სარალიძე, ქუჩური გარჩევის დროს მოკლეს.