პოლიტიკა

მოხარული ვარ, რომ სუს-ისა და დაზვერვის სამსახურის გაერთიანება არ მოხდა - დავით რაქვიაშვილი

უშიშროების ეროვნული საბჭოს მდივანმა დავით რაქვიაშვილმა განაცხადა, რომ მოხარულია, რომ მთავრობის სტრუქტურული რეორგანიზაციის პაკეტიდან გაწვეულია ყველა კანონპროექტი, რომელიც ეხება დაზვერვის სამსახურის სახელმწიფო უსაფრთხოების სამსახურთან შეერთებას.

მან აღნიშნა, რომ თავიდანვე არ ეთანხმებოდა ამ გაერთიანებას.

„ჩვენ თავიდანვე ვაცხადებდით ამ გაერთიანებაზე ჩვენს პოზიციას. მიგვაჩნდა, რომ ეს იყო სამწუხარო ტენდენცია. მოხარული ვარ, რომ ეს გაერთიანება არ მოხდა“,- უთხრა ჟურნალისტებს რაქვიაშვილმა.

უკვე გაწვეული კანონპროექტის ცვლილებების მიხედვით, სუს-ის თანამშრომელს შეეძლო, „თავისი ნამდვილი სამსახურის გაუმჟღავნებლად“, დასაქმებულიყო აღმასრულებელი ხელისუფლების ორგანოში, აგრეთვე სხვადასხვა საწარმოში, დაწესებულებასა და ორგანიზაციაში.

ანა მებურიშვილი