სამართალი

მოსმენების კანონთან დაკავშირებით საპარლამენტო უმრავლესობამ თვითიზოლაციის გზა აირჩია - გიორგი აბაშიშვილი

პრეზიდენტის ადმინისტრაციის უფროსის, გიორგი აბაშიშვილის განცხადებით, ადმინისტრაციამ საპარლამენტო უმრავლესობას ე.წ მოსმენების კანონთან დაკავშირებით კონსულტაციების გამართვა შესთავაზა, რაზეც უარი მიიღო.

როგორც აბაშიშვილმა სპეციალურ ბრიფინგზე აღნიშნა, საპარლამენტო უმრავლესობამ თვითიზოლაციის გზა აირჩია.

„ჩვენი მხრიდან, საპარლამენტო უმრავლესობისთვის შეთავაზებულ კონსულტაციებზე მივიღეთ უარი. სამწუხაროდ, ამ შემთხვევაში, საპარლამენტო უმრავლესობამ აირჩია თვითიზოლაციის გზა, რაც არ არის კარგი არც ქვეყნისათვის და არც თავად ამ პოლიტიკური ძალისათვის.

მინდა ყველას შევახსენო, რომ საკონსტიტუციო უმრავლესობა არ ნიშნავს მონოპოლიას ჭეშმარიტებაზე.

ახალი პარლამენტის არჩევის დროს, ჩვენ ვამბობდით, რომ საკონსტიტუციო უმრავლესობა იყო შესაძლებლობაც და საფრთხეც. შესაძლებლობა რეფორმებისათვის და საფრთხე ჩაკეტილობისა და ერთპიროვნული გადაწყვეტილებებისთვის.

მოვუწოდებთ უმრავლესობას, გაითვალისწინონ ის სირთულეები, რომელიც შეიძლება მოყვეს ამ პროცესს და მხოლოდ ძალიან ღია და გამჭვირვალე დისკუსიის შედეგად მიიღონ ქვეყნისათვის მნიშვნელოვანი გადაწყვეტილებები“,-განაცხადა აბაშიშვილმა.

მონიკა დავლიანიძე