სამართალი

მოვითხოვ გამოძახებული იქნას მოწმედ არჩევნების გაყალბების მთავარი ორგანიზატორი ბიძინა ივანიშვილი - შალვა ნათელაშვილი

თბილისის საქალაქო სასამართლოში ლეიბორისტული პარტიის სარჩელის განხილვა მიმდინარეობს, რომლითაც პარტია ცალკეულ საარჩევნო ოლქში ხელახალი კენჭისყრის ჩატარებას მოითხოვს.

როგორც ლეიბორისტული პარტიის ლიდერი შალვა ნათელაშვილი აცხადებს, ცენტრალური საარჩევნო კომისიის მიერ მოხდა შემაჯამებელი ოქმების გაყალბება, რის გამოც შედეგები უნდა გაბათილდეს.

მისი თქმით, არჩევნები ბიძინა ივანიშვილის მითითებით გაყალბდა და ამ პროცესში სახელმწიფოს ყველა უწყება მონაწილეობდა.

შალვა ნათელაშვილმა დააყენა შუამდგომლობა ბიძინა ივანიშვილის მოწმედ გამოცხადების შესახებ, თუმცა სასამართლომ ეს შუამდგომლობა არ დააკმაყოფილა.

„ბიძინა ივანიშვილი არის ქვეყნის დე-ფაქტო მმართველი და ბიძინა ივანიშვილის შუშის სასახლეში დაიხატა, დაიხაზა, დაიწერა არჩევნების შედეგები. ცესკო-მ ეს როგორც სანოტარო კანტორამ უბრალოდ გადაწერა და გამოაქვეყნა. ამ ბოროტმოქმედების ორგანიზატორი გახლავთ ივანიშვილი. მოვითხოვ გამოძახებული იქნას მოწმედ არჩევნების გაყალბების მთავარი ორგანიზატორი, ბიძინა ივანიშვილი და დაიკითხოს არჩევნების გარემოებებზე მთლიანად,“- განაცხადა შალვა ნათელაშვილმა.

ნინო ექვთიმიშვილი