პოლიტიკა
მუნიციპალიტეტების დაყოფასთან დაკავშირებით იყო შეცდომები დაშვებული - ნიკოლოზ როსებაშვილი
რეგიონული განვითარებისა და ინფრასტრუქტურის სამინისტროს რეგიონებისა და ადგილობრივ თვითმმართველობების ორგანოებთან ურთიერთობების დეპარტამენტის ხელმძღვანელის, ნიკოლოზ როსებაშვილის განცხადებით, 2014 წელს მუნიციპალიტეტების დაყოფისას შეცდომები იყო დაშვებული.
მისი თქმით, 7 თვითმმართველობის ქალაქიდან 14-ამდე გაზრდა არაეფექტური გამოდგა.
„2014 წელს განხორციელებული თვითმმართველობის რეფორმა თვითმმართველობის კუთხით იყო რა თქმა უნდა, წინგადადგმული ნაბიჯი. დაიხვეწა თვითმმართველობების კანონმდებლობა. ეს რეფორმა იყო მრავალკომპონენტიანი, მათ შორის შემოვიდა არჩევითობა და ა.შ. ამ ცვლილებების ერთ-ერთი კომპონენტი სწორედ გახლდათ 7 თვითმმართველი ქალაქის გაყოფის საკითხი.
აქ საუბარია სწორედ გაყოფაზე და ამ გაყოფის შედეგად სიტუაციის შეფასებაზე, რაც მივიღეთ 14 თვითმმართველ ქალაქში. აქ ფასდება: მათი ეფექტური მუშაობა, ფინანსური ნაწილი, რამდენად გაიზარდა ჩართულობა მუნიციპალიტეტებში, რამდენად გაეზარდათ საკუთარი შემოსავლები, რამდენად უფრო ხელმისაწვდომი გახდა სერვისები და იმოქმედა თუ არა გაყოფამ ამ კომპონენტებზე.
ამ ნაწილში ვიძახით, რომ შედეგები, რომელიც იყო დაგეგმილი, არ დადგა. ამიტომ, არის საუბარი სამომავლოდ კომპლექსურ ცვლილებებზე, რაც ეხება არა მხოლოდ მათ გაერთიანებას, არამედ სხვა ცვლილებებსაც, რომელმაც უნდა მოიტანოს მოსახლეობის მეტი ჩართულობა, ეფექტიანობის გაზრდა და გრძელვადიან პერსპექტივაში დეცენტრალიზაციის კარგი სტრატეგიის დაწერით ხედვის ჩამოყალიბება.
მუნიციპალიტეტების დაყოფასთან დაკავშირებით იყო შეცდომები დაშვებული. ვერ მოხდა ის, რომ მეტად მისულიყო თვითმმართველობა მოსახლეობასთან, რაც მიზნად იყო დასახული“, - განაცხადა როსებაშვილმა სასტუმრო „რედისონში“ გამართული შეხვედრის შემდეგ.
შეგახსენებთ, დღეს სასტუმრო „რედისონში“ საქართველოს პარლამენტის თავმჯდომარემ ირაკლი კობახიძემ და რეგიონული განვითარებისა და ინფრასტრუქტურის მინისტრმა ზურაბ ალავიძემ საერთაშორისო ორგანიზაციებისა და დიპლომატიური კორპუსის წარმომადგენლებს თვითმმართველობების კუთხით დაგეგმილი ცვლილებები გააცნეს.
ანა მებურიშვილი