პოლიტიკა

მზად ვარ, ვიყო ერთ-ერთი კანდიდატი საპრეზიდენტო არჩევნებში - დავით უსუფაშვილი

„შენების მოძრაობის“ ლიდერი დავით უსუფაშვილი მზადაა, წლევანდელ საპრეზიდენტო არჩევნებში მიიღოს მონაწილეობა. ამის შესახებ მან გადაცემა „რეზიუმეში“ თქვა.

„დიახ, მე მზად ვარ, ვიყო ერთ-ერთი კანდიდატი საპრეზიდენტო არჩევნებში, მაგრამ არჩევნებამდე ჯერ კიდევ ბევრი დროა, რომ მივიხედ-მოვიხედოთ და ავწონ-დავწონოთ, რამდენად სწორია ესა თუ ის ნაბიჯი არა მხოლოდ წარმატება-წარუმატებლობის შანსების აწონ-დაწონვის თვალსაზრისით, არამედ, რა ხდება ზოგადად სპექტრში - ვინ აპირებს კიდევ ამ პროცესში ჩართვას და თუ ვინმე აპირებს, რა პლატფორმით აპირებს. თუ ვხედავთ, რომ მსგავსია ჩვენი ხედვები, პლატფორმები 2-3 შესაძლო კანდიდატის, ალბათ აჯობებს, სანამ კანდიდატობას შევუდგებით, გვქონდეს ერთმანეთთან კომუნიკაცია“, - განაცხადა პოლიტიკოსმა.

უსუფაშვილი 2012 წლის საპარლამენტო არჩევნებში საბურთალოს მაჟორიტარ დეპუტატად აირჩიეს. შემდგომ ის ახალშეკრებილი მე-8 მოწვევის პარლამენტის თავმჯდომარედ დაამტკიცეს. მოგვიანებით მან ქართული ოცნება და რესპუბლიკური პარტია დატოვა და მცირეხნიანი პაუზის შემდეგ 2016 წელს „შენების მოძრაობა“ დააარსა.

საქართველოში საპრეზიდენტო არჩევნები 2018 წლის ოქტომბერში გაიმართება.