საზოგადოება

ნაციონალური მოძრაობა და 25 არასამთავრობო ორგანიზაცია დევნილთა სამინისტროსთან საპროტესტო აქციების გამართვას იწყებს

ნაციონალური მოძრაობა და 25 დევნილთა არასამთავრობო ორგანიზაცია, რომლებიც აფხაზთა კრებაში შედიან, ლტოლვილთა და განსახლების სამინისტროსთან 2 თებერვლიდან პერმანენტული აქციების გამართვას იწყებს.

როგორც პრესკონფერენციაზე ნაციონალური მოძრაობის წევრმა ნუგზარ წიკლაურმა განაცხადა, ამის მიზეზი გახდა სამინისტროს გეგმა, რომლის მიხედვით, დევნილთა ნაწილს 45-ლარიან სახელმწიფო დამხარება მოეხსნება.

აქციების მიზანია, რომ ხელისუფლებამ შეაჩეროს ამ მავნებლური გადაწყვეტილების განხორციელება.

“ამ დახმარების მოხსნა ნიშნავს ათასობით ადამიანის გაწირვას შიმშილისა და სიცივისთვის. დოკუმენტში ასევე საუბარი არის დევნილთათვის სტატუსის ჩამორთმევაზე, რაც არის ძალიან მძიმე პოლიტიკური მნიშვნელობის საკითხი და ნიშნავს იმას, რომ ხელისუფლებამ გადაწყვიტა საბოლოოდ უარი თქვას აფხაზეთში და ცხინვალის რეგიონში ჩვენი დევნილების დაბრუნებაზე“,-აღნიშნა წიკლაურმა.

პარტიის კიდევ ერთმა წევრმა, ლტოლვილთა და განსახლების მინისტრის ყოფილმა მოადგილემ ბესიკ წერედიანმა დევნილთა მინისტრს კითხვით მიმართავს, თუ რატომ არ გაიწერა ეს გეგმა „ქართული ოცნების“ საარჩევნო პროგრამაში.

„ვეკითხები ბატონ სუბარს, რატომ არ იყო ეს ჩაწერილი „ოცნების“ საარჩევნო პროგრამაში, თუ ამას აპირებდნენ. რატომ არ იყო ის ბევრი ნაბიჯი გაწერილი საარჩევნო პროგრამაში, რასაც აპირებენ სოციალური მიმართულებით? იმიტომ რომ, არჩევნებს წააგებდნენ, მათ ხმას არ მისცემდა ის ამომრჩეველიც კი, ვინც მისცა“,-აღნიშნა წერედიანმა.

მონიკა დავლიანიძე