პოლიტიკა

ნიკა რურუა ხელისუფლებას საარჩევნო სიების გაყალბებაში ადანაშაულებს

ნაციონალური მოძრაობის მთაწმინდის მაჟორიტარობის კანდიდატი ნიკა რურუა მმართველ გუნდს საარჩევნო სიების გაყალბებაში ადანაშაულებს.

როგორც რურუამ დღევანდელ პრესკონფერენციაზე განაცხადა, სიებზე გარდაცვლილი და უცხოეთში მცხოვრები ადამიანების მიწერა მოხდა.

მაჟორიტარობის კანდიდატი ვარაუდობს, რომ მიწერილი ამომრჩევლების ხმები მისი კონკურენტის, სალომე ზურაბიშვილის სასარგებლოდ გამოიყენეს.

,,ბოლო პერიოდში მთაწმინდაზე დამატებულია 8 ათასამდე ადამიანი, რომელიც არ ცხოვრობს არცერთ მისამართზე. მათ შორის არიან ადამიანები, ვინც არცერთ მისამართზე არ არის ან მიწერილია ორგანიზაციებზე, მაგრამ, რეალურად იქ არ ცხოვრობს, ადამიანები, ვინც საზღვარგარეთაა წასული 10 წელი, 15 წელი, 30 წელი. ეს არის მხოლოდ ის ხალხი, ვინც მხოლოდ 2016 წელს დაამატეს სიაში. ასევე სიაში არიან გარდაცვლილები, ადამიანები, ვინც გარდაცვლილები არიან 2 წელია. ისინი 2016 წელს დაამატეს სიაში. ასევე არიან ადამიანები, ვინც ოდესღაც ცხოვრობდა აქ, მაგრამ ახლა აღარ ცხოვრობენ და არიან სრულიად დაუდგენელი პირებიც. ესენიც ასევე მიამატეს 2016 წელს საარჩევნო სიას. 2016 წელს მიწერილი ადამიანების რაოდენობა არის 4 300-ზე მეტი. ცესკომ-მ პირველი ტურის შემდეგ ჩემ ოპონენტებს, ანუ ხელისუფლების ფავორიტს დაუწერა დაახლოებით 10 ათასი ხმა. ეს სია, რომელიც ბოლო ხანებში დაემატა საარჩევნო სიას, აღემატება 8 ათასს. ბევრი მათგანის იდენტობა შეიძლება იყო გამოყენებული ზურაბიშვილის სასარგებლოდ. ეს ცხადია, არის გაყალბება და მეორე ტურში ამას ჩვენ არ დავუშვებთ’’, - განაცხადა ნიკა რურუამ.

მაჟორიტარობის კანდიდატი უახლოეს მომავალში სასამართლოში შესაბამისი სარჩელის შეტანას გეგმავს.

ნინო ექვთიმიშვილი