საზოგადოება

ნინო ლაცაბიძის ინიციატივით ბერი გაბრიელ სალოსის გამზირზე სკვერი მოეწყობა

თბილისის საკრებულოს ისნის რაიონის მაჟორიტარი დეპუტატი, ნინო ლაცაბიძე ბერი გაბრიელ სალოსის გამზირის, მეშვიდე შესახვევის პირველი და მესამე კორპუსების მცხოვრებლებს შეხვდა და აღნიშნულ კორპუსებს შორის არსებული სივრცის მოწყობის პროექტი წარუდგინა.

როგორც მაჟორიტარმა განმარტა, მეშვიდე შესახვევის პირველი კორპუსის მცხოვრებლებმა მის წარმომადგენლობას მიმართეს თხოვნით, რომ პირველ და მესამე კორპუსების მიმდებარე ტერიტორიაზე თანამედროვე ტიპის გასართობი - სარეკრეაციო სივრცე მოწყობილიყო.

„გადავწყვიტეთ, რომ ამ პროექტის განხორციელებაში ადგილობრივი მოსახლეობა მაქსიმალურად ყოფილიყო ჩართული, რადგან ადგილობრივი თვითმმართველობის განხორციელების პროცესში მოქალაქეთა თანამონაწილეობა ძალიან მნიშვნელოვანია. მოსახლეობასთან გავიარეთ კონსულტაცია, თუ როგორი უნდა იყოს სკვერი და დღეს საბოლოო პროექტი წარმოვადგინეთ, რომელიც ადგილობრივებს კიდევ ერთხელ გავაცანით, რათა მათი ყველა სურვილი და ინიციატივა პროექტში იყოს ასახული“, - განაცხადა ნინო ლაცაბიძემ.

მისი თქმით, აღნიშნულ ტერიტორიაზე უახლოეს მომავალში თანამედროვე ტიპის სკვერი მოეწყობა.