რეგიონები

პანკისობა-2018 ჩაიშალა

„პანკისობა 2018“ ჩაიშალა.

სუს-ის მიერ ჩატარებული სპეცოპერაციის შედეგად დაღუპული თემირლან მაჩალიკაშვილის მამა, მალხაზ მაჩალიკაშვილი , მისი ოჯახი, ოჯახის ახლობლები და ადგილობრივები დილიდან სოფელ დუისის სასაფლაოსთან ღონისძიების ჩატარებას აპროტესტებდნენ.

მალხაზ მაჩალიკაშვილმა პანკისობაზე მოსულ ხალხს მოუწოდა, ტერიტორია დაეტოვებინათ. მისი აზრით, აღნიშნულ ტერიტორიაზე ღონისძიების გამართვა არასწორია, რადგან ამ ადგილთან ახლოს მისი შვილია დასაფლავებული.

მისი თქმით, პანკისელებს სასიმღეროდ საქმე არ აქვთ, რადგან მისი შვილის საქმე არაა გამოძიებული.

„აქედან ორ მეტრში წევს დახვრეტილი მძინარე ბავშვი და დღეს მოვიდნენ მის ძვლებზე და სისხლზე სათამაშოდ. თუ ამდენი ადამიანობა გაქვთ, დამიდექით გვერდით, დაისაჯონ ის ნაძირლები, რომ მეც დამასვენონ, ჩემი შვილიც საფლავში დაასვენონ და საქართველომაც დაისვენოს. დასაჯონ გომელაური, დაისაჯოს გახარია, დაისაჯონ დამნაშავე სპეცრაზმელები“, - განაცხადა მაჩალიკაშვილმა.

ამასთან დაკავშირებით ახმეტის მუნიციპალიტეტის მერმა სოსო ქარუმაშვილმა განაცხადა, რომ ამ ადგილზე „პანკისობა 2018“-ის გამართვა ადგილობრივებთან შეთანხმებული იყო და რომ სცოდნოდათ, ასეთ რეაქციას გამოიწვევდა, ღონისძიებებისთვის სხვა ადგილს შეარჩევდნენ.