პოლიტიკა
პარლამენტის თავმჯდომარე არ არის ჩვენი უფროსი - დავით ჭიჭინაძე არ გამორიცხავს ირაკლი კობახიძის გადადგომის საკითხის დაყენებას
„ქართული ოცნების“ წევრის, დავით ჭიჭინაძის განცხადებით, ირაკლი კობახიძის ბოლოდროინდელი განცხადებები მისთვის მიუღებელია, მათ შორის გედევან ფოფხაძის მიმართ გამოთქმული კრიტიკა.
„მე ვერ გავიზიარებ იმას, რომ გუშინ და გუშინწინ მოსული ადამიანები, რომლებიც მოვიდნენ „ქართულ ოცნებაში“, იმათ არ გაიზიარონ პრემიერ-მინისტრის სულისკვეთება და რაღაცა პირადი კერძო სარგებელი მიიღეს ამ „ქართულ ოცნებაში“ ყოფნით და დღეს ვინც მათ ეს მიანიჭა, იმის გამო უპირისპირდებიან პრემიერს. პარლამენტის თავმჯდომარე, მე მგონი, არ არის ჩვენი უფროსი. ის არის ჩვენ მიერ არჩეული ახალგაზრდა ადამიანი, რომელსაც ვენდობოდით, მაგრამ ჩვენთვის ძალიან მიუღებელი გახდა ბოლოდროინდელი მისი განცხადებები, თუნდაც ჩვენს კოლეგაზე, რომ ესეთი შეურაცხყოფილი ტონით მოიხსენიებს გედი ფოფხაძეს. გედი ფოფხაძეს საკმაოდ დიდი დამსახურება მიუძღვის „ქართულ ოცნებაში“ და ამიტომ ვიძახი, ის ადამიანები, ვინც გედი ფოფხაძეს მიმართ რაღაც ბრალდებებს ასახელებენ, ჯობია, პირში წყალი გამოივლონ“, - განაცხადა ჭიჭინაძემ.
კითხვაზე, მოსალოდნელია თუ არა, საპარლამენტო უმრავლესობის ნაწილმა ირაკლი კობახიძის გადადგომის საკითხი დააყენოს, ჭიჭინაძემ უპასუხა, რომ „თუ ეს საკითხი დროულად არ გაჩერდება, გამორიცხული არაფერი არ არის“.
ინფორმაცია, რომ უმრავლესობის ნაწილმა შეიძლება დააყენოს ირაკლი კობახიძის იმპიჩმენტის საკითხი, მას შემდეგ გაჩნდა, რაც გედევან ფოფხაძემ საზოგადოებრივი მაუწყებლის სამეურვეო საბჭოში ნინია კაკაბაძის არჩევის გამო საპარლამენტო მმართველი გუნდის დატოვების გადაწყვეტილება მიიღო.
ფოფხაძის განცხადებებს პარლამენტის თავმდჯომარე გამოეხმაურა და თქვა, რომ დეპუტატმა „საკმაოდ მძიმე შეურაცხყოფა მიაყენა თავის თანაგუნდელებს და ეს გააკეთა რელიგიური თემის სპეკულირების ფონზე“.