საზოგადოება

პირველივე მოკვლევით ჩანს სადემონტაჟო სამუშაოების კონკრეტული სტანდარტებია დარღვეული - ელზა ჯგერენაია

ჯანდაცვის სამინისტროს შრომისა და დასაქმების სამსახურის ხელმძღვანელი ელზა ჯგერენაია დიდუბეში ავარიული სახლის დემონტაჟისას მომხდარ უბედურ შემთხვევას გამოეხმაურა. მისი თქმით, კომპანიამ დაარღვია სადემონტაჟო სამუშაოების სტანდარტი, რაც გულისხმობს არა ხელით, არამედ სპეციალური ინსტრუმენტებით მუშაობას.

„ამ სამუშაოებს არეგულირებს ტექნიკური რეგლამენტი, სადაც კონკრეტული სტანდარტია დარღვეული, რომელიც ეხება სადემონტაჟო სამუშაოების შესრულებას. ეს სამუშაოები უნდა შეესრულებინათ არა ხელითა და კუსტარული იარაღებით, არამედ შესაბამისი ინსტრუმენტებით, რომელიც ამ დასანგრევი ობიექტის სიმაღლის პროპორციული მანძილით იქნებოდა დაშორებული. ეს ნორმები პირველი მოკვლევით ჩანს, რომ დარღვეულია, ამიტომაც მოჰყვნენ დასაქმებულები ამ მდგომარეობაში. რაც შეეხება ნებართვას, ამას შესაბამისი სამსახური დაადგენს. ჩვენ ვთანამშრომლობთ ასევე საგამოძიებო უწყებასთან და გამოძიების შედეგად გამოიკვეთება, რა ხდება“, - განაცხადა ჯგერენაიამ.

ჯანდაცვის სამინისტროს შრომისა და დასაქმების სამსახურის ხელმძღვანელმა აღნიშნა, რომ მომხდარზე პასუხისმგებლობა რამდენიმე უწყებაზე ნაწილდება, კერძოდ შრომითი უსაფრთხოების ზომების დაცვა ჯანდაცვის სამინისტროს კომპეტენციაში შედის, სამშენებლო ობიექტზე უსაფრთხოება კი - მერიის ზედამხედველობის სამსახურის.

შეგახსენებთ, დღეს დიდუბეში, წერეთლის ქუჩის 35-37 ნომერში იტალიურ ეზოში ავარიული სახლის დემონტაჟისას კედელი ჩამოიშალა, რასაც ერთ-ერთი მუშა - 32 წლის მამაკაცი ემსხვერპლა. ის ნანგრევებიდან ამოყვანის შემდეგ უგონო მდგომარეობაში იმყოფებოდა, ექიმებმა მისი გადარჩენა ვეღარ შეძლეს. კიდევ სამი დაშავებული მუშა საავადმყოფოში არიან გადაყვანილი.

შინაგან საქმეთა სამინისტრომ მომხდარზე გამოძიება დაიწყო სისხლის სამართლის კოდექსის 240-ე მუხლის მეორე ნაწილით, რომელიც გულისხმობს სამშენებლო ან სხვა სამუშაოს წარმოებისას უსაფრთხოების წესის დარღვევას, რამაც გამოიწვია ადამიანის სიცოცხლის მოსპობა ან სხვა მძიმე შედეგი.

ანა მებურიშვილი