პოლიტიკა

პრეზიდენტისა და ოპოზიციის ერთობლივი დოკუმენტი პიარკომპანიაა - მამუკა მდინარაძე

ფრაქცია „ქართული ოცნების“ თავმჯდომარემ, მამუკა მდინარაძემ პრეზიდენტისა ოპოზიციის მიერ საკონსტიტუციო ცვლილებებზე შემუშავებული დოკუმენტი პიარკომპანია უწოდა.

„პრეზიდენტისა და ოპოზიციის მიერ მომზადებული დოკუმენტი პიარკამპანიაა იმ კონსტიტუციის წინააღმდეგ, რომელმაც პროგრესი უნდა უზრუნველყოს“, -განუცხადა დეპუტატმა ჟურნალისტებს.

მდინარაძემ კონსესუსის მიუღწევლობაში ოპოზიცია დაადანაშაულა.

„კონსენსუსის შემთხვევაში, საუბარი იყო გარკვეულ დათქმებსა და იურიდიულ მექანიზმებზე. ისიც ვიცით, რომ ორი-სამი თვის განმავლობაში პასუხის გაუცემლობა, რაც ჩვენმა ოპონენტებმა უზრუნველყვეს, ის არის, რომ კონსენსუსი არ შემდგარიყო. აქედან გამომდინარე, ჩვენს დაპირებას, რომ კონსტიტუცია შეიცვლებოდა და ბუნებრივია, დადებითად შეიცვლებოდა, აუცილებლად შევასრულებთ“ ,- თქვა მდინარაძემ.

შეგახსენებთ, პრეზიდენტმა გიორგი მარგველაშვილმა ოპოზიციასთან შემუშავებულ დოკუმენტს ვენეციის კომისიასა და მმართველ პარტიას გაუგზავნა. ამის შესახებ ქვეყნის პირველმა პირმა ჟურნალისტებს გუშინდელ საგანგებო ბრიფინგზე აცნობა.

ანა მებურიშვილი