პოლიტიკა
პრეზიდენტს არ აქვს არც ადამიანური და არც პარტიული რესურსი -დიმიტრი ხუნდაძე
„ქართული ოცნების“ დეპუტატის, დიმიტრი ხუნდაძის შეფასებით, საქართველოს მოქმედ პრეზიდენტ გიორგი მარგველაშვილს არ გააჩნია არც ადამიანური, არც პარტიული რესურსი, რათა მმართველი გუნდის საპრეზიდენტო კანდიდატს კონკურენცია გაუწიოს.
ხუნდაძის თქმით, მარგველაშვილის მონაწილეობა საპრეზიდენტო არჩევნებში მარცხით დასრულდება.
„ვფიქრობ, ეს არის მისი მცდელობა, წარმოაჩინოს საკუთარი თავი. მას აქვს ამის უფლება, რამდენადაც ღიმილის მომგვრელი უნდა იყოს. მას აქვს არჩევნებში მონაწილეობის უფლებაც, მაგრამ ეს აუცილებლად მარცხით დასრულდება“, – განაცხადა ხუნდაძემ.
გუშინ სამოქალაქო საზოგადოებასთან შეხვედრაზე საქართველოს პრეზიდენტმა კითხვაზე, იქნება თუ არა საპრეზიდენტო კანდიდატი, განაცხადა, რომ პასუხის არგაცემით სამსახურს გაუწევს პოლიტიკურ ელიტას, როგორც მმართველ „ქართულ ოცნებას“, ასევე ოპოზიციას.
მარგველაშვილმა თქვა, რომ აღნიშნულ კითხვაზე დადებითი პასუხის შემთხვევაში „ქართული ოცნება“ უფრო ძლიერ კანდიდატს წარადგენს, ხოლო უარყოფითი პასუხისას - უფრო სუსტს.
ანა მებურიშვილი