საზოგადოება

პროფესიულ კოლეჯში სტაჟირებაგავლილი შედუღების 10 სპეციალისტი პოლონეთში დროებით დასაქმდება

სამუშაოს მაძიებელთა პროფესიული მომზადება გადამზადებისა და კვალიფიკაციის ამაღლების სახელმწიფო პროგრამის ფარგლებში, შედუღების 10 სპეციალისტი, პროფესიულ კოლეჯ „სპექტრში“ სტაჟირების წარმატებით გავლის შემდეგ პოლონეთში დროებით დასაქმდება.

ინფორმაცია ამის შესახებ ჟურნალისტებს საქართველოს შრომის, ჯანმრთელობისა და სოციალური დაცვის მინისტრის მოადგილემ, ზაზა სოფრომაძემ მიაწოდა.

როგორც ზაზა სოფრომაძემ ბრიფინზე აღნიშნა, საზღვარგარეთ დროებითი ლეგალური დასაქმების შესაძლებლობები, სირთულეები და რისკები შეფასდება, რაც სახელმწიფოს მიგრაციის სფეროში სახელმწიფოთაშორისი თანამშრომლობის ეფექტიანი მოდელის შემუშავებაში დაეხმარება.

მისივე ინფორმაციით, პარალელურად, ისრაელთან კვალიფიციური სპეციალისტების ბინადრობისა და საზღვარგარეთ დროებითი ლეგალური დასაქმების შესახებ ხელშეკრულებების გასაფორმებლად მიმდინარეობს მუშაობა.

„დროებით შრომითი ემიგრაციის ლეგალურ ჩარჩოებში მოქცევა გახლავთ ჩვენი ერთ-ერთი მთავარი ამოცანა. პირველი ნაბიჯები ამ მხრივ გადადგმულია. ამ პროცესს ჩვენ ცირკულარულ ემიგრაციას ვეძახით და ცხადია, რომ ცირკულარული ემიგრაციის პირობებში ლეგალურ ჩარჩოებში დასაქმების მოქცევა, ხელს უწყობა იმას, რომ საზღვარგარეთ ჩვენი მოქალაქეების ყველა უფლება იყოს დაცული, თვალი მივადევნოთ, რა პირობებში უხდებათ მათ შრომა. ცხადია, ეს ყველაფერი განპირობებულია მათი შემოსავლების, უნარებისა და ცოდნის მატებასთასთან, პროფესიული უნარების გაზრდასთან, რაც მათ ბუნებრივია, გამოადგებათ“, - განაცხადა სოფრომაძემ.

მისივე თქმით, აქტიურად განიხილება ამ მიმართულებით ავსტრიასთან, რუმინეთთან, საბერძნეთთან და კატარის რესპუბლიკასთან თანამშრომლობის გზები.

ჯანდაცვის სამინისტროს ცნობით, მიგრაციის საერთაშორისო ორგანიზაცია (IOM) საქართველოს შრომის, ჯანმრთელობისა და სოციალური დაცვის სამინისტროსთან თანამშრომლობით ახორციელებს საცდელ პროექტს - „საქართველოს სამუშაო ძალის დროებითი შრომითი მიგრაციის პილოტირება პოლონეთსა და ესტონეთში“.

ნინო ექვთიმიშვილი