კომენტარი

პროცესი, პირველ რიგში, ბანკის ინტერესებიდან გამომდინარე უნდა წარიმართოს - ბიზნესომბუდსმენი

ბიზნესომბუდსმენი, ირაკლი ლექვინაძე "თიბისი ბანკის" და მისი დამფუძნებლების ირგვლივ მიმდინარე მოვლენებს ეხმაურება. ის მზაობას გამოთქვამს, რომ ბანკის წარმომადგენლებს შეხვდეს.

"ბანკთან მიმდინარე პროცესებთან დაკავშირებით გავაკეთეთ უკვე რამდენიმე განცხადება. არსებობს, ერთი მხრივ, ეროვნული ბანკის გადაწყვეტილება, მეორე მხრივ, ეს გადაწყვეტილება გასაჩივრებულია სასამართლოში. ამიტომ, ბიზნესომბუდსმენის მხრიდან, ბუნებრივია, ორივე ინსტიტუციის პატივისცემის ნიშნად, ჩვენ უნდა დაველოდოთ საბოლოო გადაწყვეტილებებს და ალბათ, ეს იქნება საბოლოო პასუხი ამ პროცესზე. ნებისმიერ პოლიტიკურ შეფასებას მე, რა თქმა უნდა, ვემიჯნები და ვფიქრობ, რომ პროცესი, პირველ რიგში, ბანკის ინტერესებიდან გამომდინარე უნდა წარიმართოს," - განაცხადა ლექვინაძემ.

ეროვნული ბანკი თიბისი ბანკისგან სამეთვალყურეო საბჭოს თავმჯდომარისა და თავმჯდომარის მოადგილის მიერ საბჭოს წევრობის დატოვებას ითხოვს. მათივე ინფორმაციით, რეგულატორის მოთხოვნა უკავშირდება 2007-2008 წელს შესრულებულ კონკრეტულ ტრანზაქციებს, რომლებიც ეროვნული ბანკის მიერ კლასიფიცირდება როგორც ინტერესთა კონფლიქტის მარეგულირებელი კანონმდებლობის დარღვევა.

"თიბისი ბანკმა" სებ-ის გადაწყვეტილება გაასაჩივრა.

შეგახსენებთ, რომ საქართველოს გენერალურ პროკურატურაში „თიბისი ბანკთან“ დაკავშირებით გამოძიება უკანონო შემოსავლის ლეგალიზაციის ფაქტზე მიმდინარეობს. როგორც პროკურატურაში განმარტავენ, 2008 წლის აპრილ-მაისში, კომპანიებმა შპს „სამგორი M-მა“ და „სამგორი თრეიდმა“ „თიბისი ბანკისგან“ საბრუნავი სახსრების შევსების მიზნობრიობით დაახლოებით 17 მილიონი აშშ დოლარის ოდენობით სესხი აიღეს, რაც იმავე დღეს სესხის სახით გაცემული იქნა ფიზიკურ პირებზე - ბადრი ჯაფარიძესა და მამუკა ხაზარაძეზე. როგორც პროკურატურაში განმარტავენ, მთელ ამ პერიოდში საგულისხმოა ის ფაქტი, რომ არც „სამგორი M-სა“ და არც „სამგორი თრეიდის“ მიერ სესხის სახით აღებული თანხის გაღება არ მომხდარა, ხოლო მოგვიანებით მათი ჩანაცვლება მოხდა ოფშორში რეგისტრირებული კომპანიით და დღემდე ეს თანხა ანაზღაურებული არ არის „თიბისი ბანკისთვის“.