უახლესი ამბები
- 26.04.2024 18:36ჩვენი გზა უნდა მიდიოდეს ევროპაში ორივესი ერთად, მაგრამ რუსეთისკენ მიდიხართ, რუსეთში მიგვათრევთ - ლილე ლიპარტელიანი `ოცნებას`
- 26.04.2024 18:19ლექტორის მკვლელობის ფაქტზე სასამართლომ ორ პირს 20-20 წლით თავისუფლების აღკვეთა შეუფარდა
- 26.04.2024 18:1015 პარტნიორი უნივერსიტეტი, 140-მდე სტიპენდიატი - საქართველოს ბანკის სასტიპენდიო პროგრამის გამარჯვებულები ცნობილია
- 26.04.2024 17:3328 აპრილს თითოეული ქართველის ადგილი რუსთაველზეა - ლევან ხაბეიშვილი
არქივი
პოლიტიკა
ქართული დიპლომატიის ამოცანა უნდა იყოს, რომ მსოფლიომ საქართველოს სიტუაცია არ დაივიწყოს - სალომე ზურაბიშვილი
პარლამენტის დიასპორისა და კავკასიის საკითხთა კომიტეტის თავმჯდომარის პირველი მოადგილე სალომე ზურაბიშვილი გამოეხმაურა დიდი ბრიტანეთის წარმომადგენლის, ჯონათან ალენის განცხადებას. გაეროს უშიშროების საბჭოს საგანგებო სხდომაზე ალენმა თქვა, რომ რუსეთი აბუჩად იგდებს საერთაშორისო სამართალს და ამის მაგალითად მოიყვანა სიტუაცია ყირიმში, აღმოსავლეთ უკრაინასა და საქართველოში.
როგორც ზურაბიშვილმა პირველ არხს განუცხადა, მნიშვნელოვანია საქართველომაც გამოხატოს სოლიდარობა მსგავსი ტრაგიკული ამბების დროს.
დეპუტატის შეფასებით, მსოფლიო ქვეყნებს შორის სოლიდარობის პრობლემა ჩნდება, თუკი საქმე რუსეთს ეხება, რაც ბრიტანეთში ყოფილი რუსი ჯაშუშის მოწამვლამ ცხადყო.
„საყურადღებო მომენტია, რომ ამ შემთხვევაში, ამერიკამ ბრიტანეთს სოლიდარობა არ გამოუცხადა და აშშ-ის პრეზიდენტმა შეფასება არ გააკეთა. უფრო სწორად, შეფასებისგან თავი შეიკავა, რაც ძალიან სამწუხაროა, რადგან მისი მთავარი პარტნიორი ამ მდგომარეობაშია. მსოფლიოში ეს სოლიდარობა საკმაოდ დარღვეულია, როცა საქმე რუსეთს ეხება. ყველა თავის ინტერესებს უფრო იცავს, ვიდრე ზოგად სოლიდარობას, რაც მოცემულობაა“, – აღნიშნა ზურაბიშვილმა.
კითხვაზე, რამდენად მნიშვნელოვანია საქართველოს ოკუპირებული ტერიტორიების საკითხის აქტუალიზაცია, ზურაბიშვილმა უპასუხა, რომ ქართული დიპლომატიის ერთ-ერთი მთავარი ამოცანა უნდა იყოს, რომ ეს თემა არ დაივიწყონ.
გარდა ამისა, ზურაბიშვილის აზრით, თვითონ საქართველოც, კერძოდ, მედია უნდა იყოს მეტად დაინტერესებული საზღვარგარეთ მიმდინარე პროცესებით.
„ეს ერთი მოვლენაა, რომელიც ხვალ დაავიწყდებათ, როგორც დღეს გაახსენდათ. ეს ჩვენი საქმიანობის ერთ-ერთი პრიორიტეტია და ეს პროცესი უნდა გაგრძელდეს, მაგრამ საქმე მხოლოდ ამ ტიპის სოლიდარობით არ კეთდება. დღეს ახსენდებათ, ხვალ ავიწყდებათ. ყველა ქვეყანა იმის მიხედვით მოძრაობს, სადაც მათი მთავარი ინტერესებია და ესეც გასაგებია და უნდა ვიცოდეთ. ამაზე ცოტა რეალისტური მიდგომაცაა საჭირო. ჩვენი დიპლომატიის ერთ-ერთი მიმართულება ისაა, რომ მუდმივ მზადყოფნაში უნდა იყო, რომ შენი საკითხი არ დაივიწყონ, მაგრამ გააქტიურება მხოლოდ ასეთი განცხადებებით არ არის. სულ, მუდამ ვეხვეწებით – აი, განცხადება გააკეთეთ და ჩვენი საკითხები გაიხსენეთ. გააქტიურება სხვა ფორმითაც შეიძლება, ჩვენ მსოფლიო მოვლენებში უფრო უნდა ვიყოთ ჩართული. მათ შორის, მედია. როცა მედიაგამოშვებებს ვუყურებთ, უცხოეთი საერთოდ გვავიწყდება. უცხოეთს ძალიან ცოტა ყურადღებას ვაქცევთ და ყოველთვის ვითხოვთ, რომ საქართველო სხვებმა გაიხსენონ და ჩვენ არ ვიცით, რა ხდება. აქცენტი სირიაზე მაქვს. ბოლო პერიოდში, სრული ტრაგედია დატრიალდა და პრაქტიკულად, ეს ჩვენს ტელევიზიებს არ ახსოვთ“, – აღნიშნა ზურაბიშვილმა.