პოლიტიკა

„ქართული ოცნების“ პოზიცია ცალკეულ საპრეზიდენტო კანდიდატებთან დაკავშირებით, შესაძლოა, მომავალ კვირას გაჟღერდეს - ლევან იზორია

საქართველოს თავდაცვის მინისტრის, ლევან იზორიას ინფორმაციით, სავარაუდოდ, „ქართული ოცნება“ მომავალ კვირას დაასახელებს, ვის დაუჭერს მხარს საპრეზიდენტო არჩევნებში.

მისივე თქმით, მმართველი გუნდი არჩევნებში საკუთარ კანდიდატს არ დააყენებს.

„რაც შეეხება საპრეზიდენტო კანდიდატს, თქვენ იცით ჩვენი გუნდის პოზიცია, რომ გუნდს არ ეყოლება საპრეზიდენტო არჩევნებში საკუთარი კანდიდატი. თუ რა პოზიციას დაიჭერს „ქართული ოცნება“ ცალკეულ კანდიდატებთან დაკავშირებით, ამაზე გუნდს ექნება თავისი პოზიცია, რომელსაც ახლო მომავალში გააჟღერებს, ეს შესაძლოა მომავალ კვირასაც მოხდეს“, - განაცხადა თავდაცვის მინისტრმა.

2008 წლის აგვიტოს ომზე საპრეზიდენტო კანდიდატ სალომე ზურაბიშვილის განცხადებასთან დაკავშირებით იზორიამ განაცხადა, რომ 2008 წელს იყო კულმინაცია იმ აგრესიული პოლიტიკის, რომელსაც რუსეთის ფედერაცია ჯერ კიდევ 90-იანი წლებიდან ახორციელებს საქართველოში სხვადასხვა ჰიბრიდული მეთოდებით.

„2008 წელს კულმინაციაზე როდესაც ვსაუბრობთ, ამ კულმინაციამ მიიღო რეალური სახე უშუალოდ მონაწილეობით და ჩვენი ტერიტორიების 20%-ის ოკუპაციით. მოვუწოდებთ რუსეთს, გაიყვანოს მისი შეიარაღებული ძალები ჩვენი ქვეყნის ტერიტორიიდან“,- განაცხადა იზორიამ.