პოლიტიკა
„ქართულმა ოცნებამ“ დაინდო ისინი, მაგრამ ჩვენ არ დაგინდობთ და ქართველი ხალხი არ დაგინდობთ - ირმა ინაშვილი
იმ საქართველოს რა ვუთხარი, რომ ეს ხალხი ლაპარაკობს დღეს უკანონო მოსმენებსა და თვალთვალზე, ეს არის, ეტყობა, ჩვენი ხვედრი, რომ ეს ავიტანოთ 4 წლის მანძილზე, - განაცხადა პარლამენტის ვიცე-სპიკერმა, ფრაქცია ,,საქართველოს პატრიოტების’’ წევრმა, ირმა ინაშვილმა პლენარულ სხდომაზე სიტყვით გამოსვლისას, სადაც ე.წ. ფარული მოსმენების შესახებ კანონპროექტს პირველი მოსმენით განიხილავენ.
მისი თქმით, ფარული მოსმენების პრაქტიკა სწორედ ,,ნაციონალურმა მოძრაობამ’’ და მისგან გამოყოფილმა უმცირესობის წევრებმა დაამკვიდრეს.
,,საკუთარი პარტიის წევრებსაც იღებდით საძინებელ ოთახებში, მარტო პოლიტიკურ ოპონენტებს არა და ეს 80 000 ფაილი თქვენი ხელისუფლებაში ყოფნის დროს დაგროვდა. ეს მასობრივი წამების ფორმაა. ასე გყავდათ დაშანტაჟებული უამრავი პოლიტიკური ოპონენტი და ქართველი ხალხი აქციეთ ამ ფარული გადაღებების მძევლად. ეს ტერორი უნდა დასრულდეს ქვეყანაში. მე ეჭვი არ მეპარება, რომ უმრავლესობის სულისკვეთება ამისკენ არის მიმართული. დერჟინსკის მეთოდები რომ გახსენდებათ დღეს, გახსენდებათ იმიტომ, რომ დერჟინსკის მემკვიდრეები და სულიერი შვილები ხართ თქვენ, „ნაციონალური მოძრაობის“ ორივე ფრთის წარმომადგენლები. ყველა ის მეთოდი, რაც ძერჟინკის ჰქონდა თავის დროზე, თქვენ დახვეწეთ, მოარგეთ 21-ე საუკუნის ტექნოლოგიას და ბატონი ადეიშვილის, სააკაშვილის და სხვა თქვენი თანამებრძოელბის წყალობით ამას ახორციელებდით. დღეს გამოდიხართ და გვიხსნით,რა ცუდია ფარული მოსმენები და თან ჭკუას გვასწავლით, რომ 9 წელი არ უნდა გავიხსენოთ. ჩვენი უფლება და ვალდებულებაა, გავიხსენოთ კი არა ის 10 წელი და პასუხი ვაგებინოთ თქვენი პარტიის ლიდერებს, რომლებიც გააქცია ამ ქვეყნიდან „ქართულმა ოცნებამ“ სხვათა შორის, გაუხსნა კარები და სააკაშვილი გაატარეს ისე, რომ პასუხი არ უგია, ადეიშვილიც გაატარა. სწორედ „ქართულმა ოცნებამ“ დაინდო ისინი, მაგრამ ჩვენ არ დაგინდობთ და ქართველი ხალხი არ დაგინდობთ, ამის დრო აუცილებლად მოვა ამ ქვეყანაში“, - განაცხადა ირმა ინაშვილმა.
რაც შეეხება იმას, თუ ვის ხელში უნდა იყოს ფარული მიყურადების ე.წ. გასაღები, ინაშვილის თქმით, ეს უნდა იყოს დამოუკიდებელი უწყების და არა სუს-ის ხელში.
,,ეს სტრუქტურა, სააგენტო უნდა იყოს დამოუკიდებელი და არანაირად პირდაპირ დაკავშირებული სუს-თან. პლუს, ჩვენ მიგვაჩნია, რომ ქვეყანაში უნდა შეიქმნას კიბერუსაფრთხოების სამსახური’’, - აღნიშნა ირმა ინაშვილმა.
ნინო ექვთიმიშვილი