საზოგადოება
რაღაც ვიდეო არსებობს, რომელშიც ჩანს, ალბათ, საშინელება... მირჩევენ, არ ნახოო - გორში მოკლული 8 წლის გოგოს ბაბუა
გორში მოკლული 8 წლის გოგოს ბაბუამ, ხვიჩა ბერიაშვილმა სკანდალური განცხადება გააკეთა. „კურიერთან“ საუბრისას მან თქვა, რომ არსებობს ვიდეო, რომელიც ბრალდებულმა იაგო ნებიერიძემ ბავშვს გატაცების შემდეგ გადაუღო.
მოკლულის ბაბუას თქმით, მას ურჩევენ, ვიდეო არ ნახოს.
„რაღაც ვიდეო არსებობს, რომელშიც ჩანს. ალბათ, საშინელება... არ ვიცი, უნდა ვნახო. როგორც მეუბნებიან, ბრალდებულის გადაღებულიაო, როგორც გამოძიება მეუბნება. მირჩევენ, არ ნახოო, მაგრამ უნდა ვნახო, რომ დავრწმუნდე და თუ ეგრე არ იქნება, გორელების იმედი მაქვს. მე მთელ საქართველოს ვეუბნები და გორიდან ვიწყებ. რომ მარტო არ დავრჩე და ნანიკოს მივხედოთ“, - თქვა ბერიაშვილმა.
მოკლულის ოჯახმა პრეზიდენტი და დეპუტატი ეკა ბესელია გააკრიტიკა, რადგან როგორც ცნობილია, მკვლელობაში ბრალდებული იაგო ნებიერიძე გიორგი მარგველაშვილმა შეიწყალა და მას წარსულში ჩადენილ დანაშაულზე ის ამნისტიაც შეეხო, რომელზეც ბესელია მუშაობდა.
„ჩვენმა საუკეთესო არასწორმა პრეზიდენტმა გამოუშვა, რომ ეს ამბავი მომხდარიყო. რა უნდოდა მაგას გარეთ. რომ ეს ბესელია კიდევ რომ იღრიჭება გიჟივით. შეხედოს , აბა, თავის შვილს. თვალებში შეხედოს. არ ვაპატიებ არავის“, - თქვა ბერიაშვილმა.
ბერიაშვილის ბრალდებას თავად ბესელიამ უპასუხა. დეპუტატის განმარტებით, მას მძიმე დანაშაულში ბრალდებული იაგო ნებიერიძე ციხიდან არ გამოუშვია და ნებიერიძე მხოლოდ სასჯელის 1/3 შემცირების შემდეგ პრეზიდენტმა ინდივიდუალურად შეიწყალა:
„ამნისტიის აქტი, რომელიც პარლამენტმა მიიღო, არ შეხებია არცერთ ძალადობრივი დანაშაულს, მუხლს და არ შეხებია ამ ადამიანს იმ დანაშაულისთვის ამნისტია, კონკრეტული მუხლის გათვალისწინებით, რაც მას ჰქონდა მსჯავრად დადგენილი. ამნისტია შეეხო ზოგადად იმ მსჯავრდებულებს, სასჯელის 1/3 ან ¼ შემცირებით, რომლებსაც ამნისტია არ ეხებოდათ, მუხლების გათვალისწინებით და ესეც ძალადობრივი დანაშაული იყო, მაგრამ ყველა დანარჩენს სასჯელი შეუმსუბუქდა 1/3 ან ¼ იმიტომ რომ ციხეებში იყო წამების სასტიკი მოპყრობის მასიური შედეგები, იყო არასამართლიანის სისხლის სამართლის პოლიტიკა და ყველა დანარჩენ სასჯელის შემცირების კუთხით და ეს ადამიანი არ გათავისუფლებულა ამნისტიის აქტით, მას ინდივიდუალური აქტი შეახო პრეზიდენტმა და პრეზიდენტმა ინდივიდუალურად შეიწყალა ის სასჯელის ნაწილში, რომელის შემდეგაც ის გათავისუფლდა“,- განაცხადა ბესელიამ.
მოკლული გოგონა გორში 25 ოქტომბერს იპოვეს, მას სხეულზე ძალადობის კვალი აღენიშნებოდა. გოგონას მკვლელობაში ბრალდებული წარსულში ნასამართლევი იაგო ნებიერიძეა.
ნებიერიძეს არასრულწლოვნის გატაცებაში კიდევ ერთი ოჯახი ადანაშაულებს. 14 წლის წინ დაკარგული 11 წლის ბავშვის კვალს ოჯახმა დღემდე ვერ მიაგნო, თუმცა ნებიერიძე სასჯელს არა ბავშვის გატაცებისთვის, არამედ თანხის გამოძალვის მცდელობისთვის იხდიდა.
8 წლის გოგონას მკვლელობის ფაქტზე, ნებიერიძეს ბრალი წარდგენილი აქვს სისხლის სამართლის კოდექსის 109-ე მუხლის მე-2 ნაწილის „ბ“ ქვეპუნქტით,რაც დამამძიმებელ გარემოებაში განზრახ მკვლელობას გულისხმობს და სისხლის სამართლის კოდექსის 141-ე მუხლით, რაც 16 წელს მიუღწეველთან, დამნაშავისთვის წინასწარი შეცნობით ჩადენილ გარყვნილ ქმედებას გულისხმობს