პოლიტიკა

როგორც იმ ღამეს იქცეოდა სპეცრაზმელთა ხროვა, როგორც ისინი იქცეოდნენ მხეცურად, დღეს თქვენ იმეორებთ ამას - მალხაზ მაჩალიკაშვილი „ქართულ ოცნებას“

პანკისის ხეობაში ჩატარებული სპეცოპერაციის დროს მოკლული თემირლან მაჩალიკაშვილის მამამ, მალხაზ მაჩალიკაშვილმა „ქართულ ოცნებას“ მიმართა და პარტიის თავმჯდომარის, ბიძინა ივანიშვილისგან მისი შვილის მკვლელობის საქმეში ყველა დამნაშავე პირების დასჯა მოითხოვა.

გარდა ამისა, მაჩალიკაშვილმა მოითხოვა, რომ სახელმწიფომ აღიაროს თავისი დანაშაული მაჩალიკაშვილის საქმეში.

„თქვენ იმის კაცობა არ გყოფნით, გამოხვიდეთ და თქვენი დანაშაული აღიაროთ. მე მოვითხოვ, სახელმწიფომ აღიაროს ეს დანაშაული.

ეს დღეს იწყება პანკისის ხეობიდან. დღეიდან ეს მიიღებს სულ სხვა ფორმებს და მოვითხოვ ამ „ოცნების“ გუნდის თავმჯდომარეს, დასაჯე ეს ყველა მხეცი, ვინც ჩაატარა პანკისის ხეობაში ეს ტერორისტული აქტი, ვინც დახვრიტა მძინარე ბავშვი, ვინც დამაყაჩაღა. თქვენ დღეს ისე იქცევით, როგორც იმ ღამეს იქცეოდა სპეცრაზმელთა ხროვა, როგორც ისინი იყვნენ პანიკაში, როგორც ისინი იქცეოდნენ არაადამიანურად, მხეცურად, დღეს თქვენ იმეორებთ ამას, ამას თქვენ არ გაპატიებთ, არც მე, არც ჩემი ერი და არც ქართველი ერი. ეს განცხადება დაიმახსოვრეთ, ამას თქვენ არ გაპატიებთ“, - განაცხადა მაჩალიკაშვილმა „ქართული ოცნების“ ოფისთან.

აქციის მონაწილეები სოსო გოგაშვილის დასჯას ითხოვენ, რადგან მათი თქმით, სწორედ გოგაშვილი ხელმძღვანელობდა სპეცოპერაციას, რომელის პანკისში გასულ წელს ჩატარდა და რომელსაც 19 წლის თემირლან მაჩალიკაშვილის სიცოცხლე ემსხვერპლა.

მმართველი პარტიის ოფისთან სამართალდამცავები არიან მობილიზებულები. საპატრიარქოს მოპირდაპირედ მდებარე სკვერში კი სამართალდამცველთა დამატებითი რაზმებია განთავსებული, სკვერში ათობით პოლიციელი და საპატრულო პოლიციის ეკიპაჟი დგას.