კომენტარი

რუსეთის მოქალაქეობის მისაღებად ადამიანს იმის მიხედვით შეარჩევენ, თუ როგორ შეაქცევს იგი ზურგს სამშობლოს - რომან გოცირიძე

პარტია ნაციონალური მოძრაობის წევრი რომან გოცირიძე მიიჩნევს, რომ რუსეთის დუმის კომიტეტის მიერ დამტკიცებული კანონპროექტი რუსეთის მოქალაქეობის მიღების გამარტივების შესახებ, რეალურად არის ჰიბრიდული ომის შემადგენელი ნაწილი.

როგორც გოცირიძემ საკითხის კომენტირებისას მედიას განუცხადა, რუსეთის მოქალაქეობას მარტივად არავის მისცემენ, გოცირიძის თქმით, ადამიანებს იმის მიხედვით შეარჩევენ, თუ როგორ შეაქცევს იგი ზურგს საკუთარ სამშობლოს და ჩადგება რუსეთის სამსახურში.

„ეს არის ერთ-ერთი ფანდი, რათა მათ პოლიტიკური ლოიალობის მიხედვით შეარჩიონ ადამიანები. ეს არ იქნება მარტივი. ნებისმიერი ადამიანი, ვინც მოინდომებს რუსეთის მოქალაქეობას, ასე მარტივად მას არავინ არ მისცემს. დააკვირდებიან მათ შეხედულებებს. მთავარი კრიტერიუმი იქნება თუ როგორ შეაქცევს ადამიანი ზურგს საკუთარ სამშობლოს და როგორ ჩადგება რუსეთის სამსახურში. ეს რეალურად არის ჰიბრიდული ომის შემადგენელი ნაწილი“,-აღნიშნა რომან გოცირიძემ.

რუსეთის სახელმწიფო სათათბიროს კომიტეტმა კანონპროექტი დაამტკიცა, რომლის მიხედვით, მოქალაქეობის მიღება მარტივდება იმ პირებისთვის,რომლებიც ყოფილ საბჭოთა კავშირში დაიბადნენ და რუსულ ენას ფლობენ.

დუმაში წარდგენილი კანონპროექტის თანახმად, სსრკ-ში დაბადებულ ყველა ადამიანს და მათ შთამომავლებს, რუსული პასპორტის გამარტივებული წესით აღება შეეძლებათ.

მონიკა დავლიანიძე