პოლიტიკა
რუსეთის პატრიარქი სხვა მართლმადიდებელი ეკლესიების მეთაურებს „უკრაინული სცენარით“ აშინებს, თუმცა ილია მეორეს ტიტულიდან აფხაზეთი ისევ ამოიღო
უკრაინის გამაერთიანებელი კრების შემდეგ, რომელმაც უკრაინაში ახალი, მსოფლიო საპატრიარქოს მიერ აღიარებული ავტოკეფალური მართლმადიდებელი ეკლესია დააფუძნა, რუსეთის პატრიარქმა კირილემ მართლმადიდებელი ეკლესიების მეთაურებს წერილით მიმართა, არ აღიარონ უკრაინის ახალი ეკლესია.
რუსეთის პატრიარქის წერილის თანახმად, კონსტანტინოპოლის საპატრიარქომ ცრუეპისკოპოსების მონაწილეობით არაკანონიკური კრება შეკრიბა, რითაც იერიში მიიტანა „კანონიკურ მართლმადიდებლობაზე“ მთელ მსოფლიოში. კირილეს მტკიცებით, კონსტანტინოპოლის საპატრიარქო უხეშად არღვევს მართლმადიდებელი ეკლესიის კანონებს.
რუსეთის პატრიარქი აღნიშნულ წერილში სხვა ეკლესიების მეთაურებს აფრთხილებს, რომ შესაძლოა, „უკრაინული სცენარი“ რომელიმე სხვა ადგილობრივ ეკლესიაში განხორციელდეს, მიუხედავად ამისა, კათოლიკოს-პატრიარქი ილია მეორე კვლავ მოიხსენიება არასრული ტიტულით. ტიტულიდან კვლავ ამოღებულია „ბიჭვინთისა და ცხუმ-აფხაზეთის მიტროპოლიტის“ წოდება.
ილია მეორის სრული ტიტულატურა:
უწმიდესი და უნეტარესი ილია II, სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და მიტროპოლიტი ბიჭვინთისა და ცხუმ-აფხაზეთისა
ილია მეორის ტიტულატურა რუსეთის საპატრიარქოს ვებგვერდზე კი:
უწმინდესი და უნეტარესი, სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი (Святейший и Блаженнейший Католикос-Патриарх всея Грузии, Архиепископ Мцхетский и Тбилисский).
რუსეთი საპატრიარქოსგან განსხვავებით, კონსტანტინოპოლის საპატრიარქო ოფიციალურ დოკუმენტებში საქართველოს ეკლესიის მეთაურის ტიტულს სრულყოფილად მოიხსენიებს.
15 დეკემბერს კიევში, წმიდა სოფიის ტაძარში შეკრებილმა მღვდელმთავრებმა, ეკლესიათა გაერთიანება გამოაცხადეს და ერთიანი, ავტოკეფალური მართლმადიდებელი ეკლესიის ახალ მწყემსთავრად, პერიასლოვისა და ბილოცერკოვის მიტროპოლიტი ეპიფანე აირჩიეს, რომელიც იქამდე კიევის საპატრიარქოს უკრაინის მართლმადიდებელი ეკლესიის მღვდელმთავარი იყო და ამავე ეკლესიის პატრიარქის, ფილარეტის მხარდაჭერით სარგებლობდა.
მართვა-გამგეობის ახალი დებულებით გაერთიანებული ეკლესიის საჭეთმპყრობელი კიევისა და სრულიად უკრაინის მიტროპოლიტის ტიტულს ატარებს.
სწორედ ამ ახლადარჩეულ საჭეთმპყრობელს გადასცემს კონსტანტინოპოლი ავტოკეფალიის ტომოსს და სწორედ ეს გაერთიანებული ეკლესია იქნება აღიარებული მსოფლიო საპატრიარქოს მიერ.