პოლიტიკა
საბერძნეთის პრეზიდენტმა აღნიშნა, რომ ქვეყნების მრავალსაუკუნოვანი კავშირები კარგი არგუმენტია საქართველოს ევროპული იდენტურობის სასარგებლოდ
საქართველოსა და საბერძნეთის პრეზიდენტებმა პირისპირ შეხვედრის შემდეგ მომდევნო შეხვედრა უკვე სახელმწიფო დელეგაციების თანხლებით გამართეს, სადაც ისაუბრეს ორმხრივი თანამშრომლობის სხვადასხვა სექტორული მიმართულებების განვითარებაზე.
საბერძნეთის პრეზიდენტმა პროკოპის პავლოპულოსმა ხაზი გაუსვა ქვეყნებს შორის არსებული პოლიტიკური და ეკონომიკური თანამშრომლობის გაძლიერების აუცილელობას.
მხარეებმა განიხილეს ენერგეტიკული, სატრანსპორტო და ინფრატრუქტურული თანამშრომლობის სამომავლო პერსპექტივები.
პავლოპულოსის თქმით, საქართველოსა და საბერძნეთის მრავალსაუკუნოვანი კავშირები კარგი არგუმენტია საქართველოს ევროპული იდენტურობის სასარგებლოდ.
ბერძნულმა მხარემ აღნიშნა საქართველოს, როგორც ევროპასა და აზიას შორის დამაკავშირებელი გზის მნიშვნელობას, განიხილეს აბრეშუმის გზის პერსპექტივები და ის სატრანზიტო შესაძლებლობები, რომელსაც საქართველო ქმნის ვეროპული ქვეყნებისთვის. საუბარი შეეხო შავი ზღვის უსაფრთხოების საკითხებსაც.
საქართველოს პრეზიდენტმა გიორგი მარგველაშვილმა მადლობა გადაუხადა ბერძენ კოლეგას საბერძნეთის მხრიდან გამოვლენილი მტკიცე მხარდაჭერისთვის როგორც ტერიტორიული მთლიანობისა და სუვერენიტეტის მიმართ, ასევე იმ მნიშვნელოვანი წვლილისთვის, რომელიც საბერძნეთმა ვიზალიბერალიზაციის პროცესში შეიტანა.
აღინიშნა, რომ მნიშვნელოვანია იმ პოზიტიური დინამიკის შენარჩუნება, რომელიც საქართველოს გააჩნია ევროპული და ევროატლანტიკური ინტეგრაციის გზაზე.
მხარეებმა ასევე ისაუბრეს კულტურულ და საგანმანათლებლო სფეროში თანამშრომლობაზე, აღინიშნა, რომ აუცილებელია განათლების სფეროში ორმხრივი თანამშრომლობის შესახებ ხელშეკრულებაზე მუშაობის განახლება.
აღნიშნეს კულტურული და ისტორიული მემკვიდრეობის დაცვის მნიშვნელობა, მათ შორის ოკუპირებულ ტერიტორიებზე. მხარეებმა ხაზი გაუსვეს, რომ ორივე ქვეყანაში მნიშვნელოვანია ძლიერი დიასპორის როლი და აუცილებელია, დიასპორების საქმიანობისთვის ხელშეწყობა.
საქართველოს მხრიდან შეხვედრას დაესწრნენ: საქართველოს პრეზიდენტის ადმინისტრაციის უფროსი გიორგი აბაშიშვილი, ეროვნული უშიშროების საბჭოს მდივანი დავით რაქვიაშვილი, საგარეო საქმეთა მინისტრის მოადგილე ვახტანგ მახარობლიშვილი, პრეზიდენტის საერთაშორისო მდივანი თენგიზ ფხალაძე, პოლიტიკური მდივანი ფიქრია ჩიხრაძე, საქართველოს პრეზიდენტის მრჩევლი ეთნიკური უმცირესობების საკითხებში სოფიო შამანიდი, საქართველოს ელჩი საბერძნეთში იოსებ ნანობაშვილი.