პოლიტიკა

საკანონმდებლო ორგანომ ხორავას ქუჩის საქმეზე დროებითი საპარლამენტო საგამოძიებო კომისიის შექმნას მხარი დაუჭირა

პარლამენტმა ხორავას ქუჩაზე მომხდარი მოზარდების მკვლელობის საქმეზე დროებითი საპარლამენტო საგამოძიებო კომისიის შექმნას მხარი დაუჭირა. რიგგარეშე სხდომაზე ჩატარებულ კენჭისყრაზე კომისიის შექმნას ხმა მისცა 95-მა დეპუტატმა, ხოლო ერთი წინააღმდეგი იყო.

კომისიის თავმჯდომარედ „ევროპული საქართველოს“ წევრი, სერგი კაპანაძე დანიშნეს. მის კანდიდატურას მხარი დაუჭირა 91-მა დეპუტატმა, ადა მარშანიას სასარგებლოდ მხოლოდ ერთმა პარლამენტარმა მისცა ხმა.

საპარლამენტო კომისია 17 წევრისგან შედგება. უმრავლესობას 9 წევრით (სერგი კაპანაძე, ოთარ კახიძე, ელენე ხოშტარია, ოთარ აბესაძე, სერგო რატიანი, ხათუნა გოგორიშვილი, მამუკა ჩიქოვანი, გიგა ბოკერია და ირმა ნადირაშვილი) „ევროპული საქართველო“ წარმოადგენს. კომისიის 6 წევრი (არჩილ თალაკვაძე, მამუკა მდინარაძე, ეკა ბესელია, ანრი ოხანაშვილი, დიმიტრი ცქიტიშვილი და სოფო კილაძე )„ქართული ოცნებიდან“ იქნება, ერთი კი (ადა მარშანია) - „პატრიოტთა ალიანსიდან“. კომისიაში ასევე შევა დამოუკიდებელი დეპუტატი სალომე ზურაბიშვილი. „ნაციონალურმა მოძრაობამ“ კომისიაში გაწევრიანებაზე უარი თქვა.

პარლამენტის საგამოძიებო კომისია სამი თვის ვადით შეიქმნა.