სამართალი

საყდრისი-ყაჩაღიანის მაღაროს შესახებ დავა საქალაქო სასამართლოში დასრულდა

საყდრისი-ყაჩაღიანის მაღაროს შესახებ არასამთავრობო ორგანიზაციებსა და სახელმწიფოს შორის ორწლიანი დავა დასრულდა.

თბილისის საქალაქო სასამართლომ სამოქალაქო სექტორისა და საიას სარჩელი არ დააკმაყოფილა და გადაწყვეტილება საქართველოს კულტურისა და ძეგლთა დაცვის სამინისტროსა და კულტურული მემკვიდრეობის დაცვის ეროვნული სააგენტოს სასარგებლოდ მიიღო.

მოსარჩელე მხარე მიიჩნევდა, რომ საყდრისი–ყაჩაღიანთან დაკავშირებით კანონი დაირღვა და კულტურული მემკვიდრეობის დაცვის ეროვნულმა სააგენტომ ძეგლს სტატუსი საფუძვლიანი შესწავლის გარეშე მოუხსნა.

სასამართლო პროცესის მიმდინარეობისას კულტურული მემკვიდრეობის დაცვის სააგენტოს საბჭოს ყველა წევრი და დარგის ის სპეციალისტები დაიკითხნენ, რომელთაც თავის დროზე ჩათვალეს, რომ საყდრისი-ყაჩაღიანის საბადოს გეოლოგიური ქანების აგებულების გამო, მისი ფიზიკური შენარჩუნება შეუძლებელი იყო. სასამართლო განხილვებისას შედგა გასვლითი სხდომებიც, რომლებიც მიზნად ისახავდა მტკიცებულებების ადგილზე გადამოწმებას.