არქივი
პოლიტიკა
სახალხო დამცველის კანდიდატურაზე არჩევნების შემდეგ ვიმსჯელებთ - მამუკა მდინარაძე
ფრაქცია „ქართული ოცნების“ თავმჯდომარე მამუკა მდინარაძე თავისი კოლეგის, პარლამენტარ სალომე სამადაშვილის ინიციატივას გამოეხმაურა, რომლის მიხედვით, სახალხო დამცველის კანდიდატურის დასახელების უფლება არასამთავრობო სექტორსაც უნდა ჰქონდეს.
მდინარაძის თქმით, კანონით უკვე განსაზღვრულია, კონკრეტულად ვინ ირჩევს ომბუდსმენს. მისივე ინფორმაციით, მმართველ პარტიაში სახალხო დამცველის კანდიდატურაზე ადგილობრივი თვითმმართველობის არჩევნების შემდეგ იმსჯელებენ.
მდინარაძემ არ გამორიცხა, რომ მმართველმა გუნდმა სახალხო დამცველის კანდიდატურაზე კონსულტაციები გამართოს მესამე სექტორთან.
„ჩვენ არჩევნების შემდეგ ვაპირებთ, რომ სახალხო დამცველის თემაზე გუნდის შიგნით დავილაპარაკოთ და წარვადგინოთ ღირსეული კანდიდატურა. რაც შეეხება არასამთავრობო სექტორის მიერ კანდიდატის დასახელებას, მე მინდა მათ ვუთხრა, რომ ამ ქვეყანაში კომპეტენციები გამიჯნულია. არსებობს ჩანაწერი იმის შესახებ, თუ ვინ უნდა დაასახელოს სახალხო დამცველის კანდიდატურა. ამ ნორმაში არ არის საუბარი არასამთავრობო სექტორზე. შესაძლებელია, გარკვეული კონსულტაციები გაიმართოს და გავითვალისწინოთ არასამთავრობო სექტორის აზრი, თუმცა ცალსახად, დღევანდელი კანონმდებლობის გვერდის ავლა არ მიმაჩნია სწორად“, - განაცხადა მდინარაძემ.
სახალხო დამცველის შესახებ საქართველოს ორგანული კანონის მიხედვით, ომბუდსმენის კანდიდატურის წარდგენის უფლება აქვს საპარლამენტო ფრაქციას, პარლამენტის წევრთა სულ მცირე ექვსკაციან ჯგუფს, რომელიც არ შედის არცერთ ფრაქციაში.
მოქმედ ომბუდსმენ უჩა ნანუაშვილს უფლებამოსილების ვადა დეკემბერში ეწურება.
ანა მებურიშვილი