პოლიტიკა

სალომე ზურაბიშვილი იქნება აფხაზეთისა და სამაჩაბლოს სამუდამო დაკარგვის შეგუების პრეზიდენტი - გიგი უგულავა

„ევროპული საქართველოს“ ერთ-ერთმა ლიდერმა გიგი უგულავამ განაცხადა, რომ თუკი სალომე ზურაბიშვილი გახდება საქართველოს პრეზიდენტი, ის შეეცდება, დაარწმუნოს მსოფლიო, რომ 2008 წლის აგვისტოს ომი საქართველომ დაიწყო. უგულავამ მოუწოდა „ქართული ოცნების“ ამომრჩეველს, არ აჰყვეს მმართველ პარტიას და არ დაუჭიროს მხარი ზურაბიშვილის კანდიდატურას საპრეზიდენტო არჩევნებზე.

„ომი {2008 წლის} საქართველომ დაიწყო - ამ განცხადებით სალომე ზურაბიშვილმა 28 ოქტომბერი რეფერენდუმად აქცია. ამიტომ, ოცნების ამომრჩეველს (არა პარტიას) მინდა მივმართო, „მადამ პრეზიდენტი“ ივანიშვილს 2024 წლის მერე სჭირდება საფრანგეთში მორიგ პერსონალურ ლობისტად. არავისთვის არაა საიდუმლო - ივანიშვილის ავლადიდების სამშობლო საფრანგეთია. მანამდე როგორც პრეზიდენტი, ის მთელ მსოფლიოში ივლის და შეეცდება, ყველა „დაარწმუნოს“ - ომი საქართველომ დაიწყო. ის იქნება აფხაზეთისა და სამაჩაბლოს სამუდამო დაკარგვის შეგუების პრეზიდენტი. ამიტომ ის გაცილებით დიდ ზიანს მოიტანს, ვიდრე ახლა წარმოგვიდგენია, - ვიდრე პრეზიდენტს დარჩენილი ფუნქციებით შეუძლია. „ოცნების“ ამომრჩევლებო, თქვენი პარტია ფატალურ შეცდომას უშვებს - ნუ იზამთ იმავეს. ყოველგვარი პათეთიკის გარეშე - შთამომავლობა არ გვაპატიებს“, -დაწერა უგულავამ ფეისბუკის საკუთარ გვერდზე.

ცნობისთვის, გუშინდელ ბრიფინგზე სალომე ზურაბიშვილმა განაცხადა, რომ 2008 წლის ომი საქართველომ დაიწყო.

„მე ყოველთვის ვამბობდი და ვამბობ, რომ ომი დაიწყო საუკუნის წინ რუსეთმა, ჩვენ იმ დროს ჩავერთეთ რუსეთის პროვოკაციაში და წავედით ამ საომარ ვითარებაში, საქართველომ დაიწყო ეს ნაწილი ამ საომარი ვითარების. ეს არის ყველასთვის ცნობილი და ოფიციალური ვერსია, რასაც ევროკავშირი ადასტურებდა, ჩვენ ამას არ გადავხედავთ. ომის ტრაგედია არის ჩვენი ტრაგედია და როგორც პრეზიდენტი ერთ რამეს გეტყვით, რომ პროვოკაციები, რომლებზეც მაშინ გვაფრთხილებდნენ ამერიკელი და ევროპელი პარტნიორები, პროვოკაციებს არ ავყვები. როცა ხარ პატარა ქვეყანა, შენ მტერზე უფრო ჭკვიანი უნდა იყო“, -თქვა ზურაბიშვილმა.

ზურაბიშვილმა გუშინ განაცხადა, რომ საკუთარ კანდიდატურას დააყენებს საპრეზიდენტო არჩევნებში.