საზოგადოება

სალომე ზურაბიშვილს რუსთავში საპროტესტო შეძახილებითა და აქციით დახვდნენ

მმართველი გუნდის მიერ მხარდაჭერილ დამოუკიდებელ საპრეზიდენტო კანდიდატს სალომე ზურაბიშვილს რუსთავში საპროტესტო შეძახილებითა და აქციით დახვდნენ.

აქციის მონაწილეები ზურაბიშვილის მიერ 2008 წლის აგვისტოს ომთან დაკავშირებით გაკეთებულ განცხადებებს აპროტესტებდნენ, სადაც საპრეზიდენტო კანდიდატმა საქართველო ომის დაწყებაში დაადანაშაულა.

მათ ზურაბიშვილთან გასაუბრებაც სურდათ, თუმცა მათთან საპრეზიდენტო კანდიდატი არ მისულა. აქციის დროს ”ქართული ოცნების” აქტივისტებთან დაპირისპირებაც მოხდა. ადგილზე სასწრაფოს გამოძახებაც გახდა საჭირო.

აქციის ერთ-ერთი მონაწილის თქმით, მას ”ქართული ოცნების” წარმომადგენელმა ფიზიკური შეურაცხყოფა მიაყენა. აქციის მონაწილეებს უმრავლესობის ლიდერი, არჩილ თალაკვაძე შეხვდა. აქციის მონაწილეებმა მისი ადგილზე მისვლა გააპროტესტეს.

„თალაკვაძე მოვიდა და სამარცხვინოდ მოგვიკითხა, ჯერ პასუხი იმაზე არ გაგვცა, რატომ არ შეგვიშვეს ადამიანები შეკითხვის დასასმელად, მერე უსამართლო იძალადეს ჩვენზე,“ - განაცხადა აქციის ერთ-ერთმა მონაწილემ.

აქციის მონაწილეები ამბობენ, რომ სალომე ზურაბიშვილის პრეზიდენტობა დაუშვებელია.

ამასთან, აქციაზე დაპირისპირების დროს დაშავდა „ნაციონალური მოძრაობის“ ორი აქტივისტი, რომელთაც დახმარება სასწრაფო დახმარების ბრიგადამ აღმოუჩინა.

„თქვენმა დასაქმებულებმა გადამიარეს, ყელში წამიჭირეს... აუცილებლად შევიტან სარჩელს“, - მიმართა ერთ-ერთმა დაშავებულმა არჩილ თალაკვაძეს, რომელმაც ისინი სასწრაფო სამედიცინო დახმარების ავტომობილში მოინახულა.

ამასთან, „ნაციონალური მოძრაობის“ კიდევ ერთი აქტივისტი თალაკვაძისგან დაინტერესდა, მოყვებოდა თუ არა დღეს მომხდარ ფაქტს რეაგირება, რაზეც საპარლამენტო უმრავლესობის ლიდერმა მას მიუთითა, რომ აღნიშნულზე პასუხი შესაბამის უწყებებს უნდა გაეცათ.

„ჩემგან გაინტერესებთ? მაგისთვის არსებობს პოლიცია და გამოძიება. თქვენ დროს როგორც იყო, ისე აღარ არის. დრო აგერიათ “, - მიმართა აქტივისტს თალაკვაძემ.

საპასუხოდ კი უმრავლესობის ლიდერს მიმართეს რეპლიკით, რომ დღეს სარდაფებში კეტავენ ხალხს.