პოლიტიკა

სანდრა რულოვსმა იმიტომ აირჩია სამეგრელო, რომ იქ ეგულება ,,ნაციონალების“ ბუდე - გოგა ხაინდრავა

გოგა ხაინდრავას განცხადებით, სანდრა რულოვსი სამეგრელოში იმიტომ იყრის კენჭს, რომ იქ კოდუების, ახალაიების და ქარდავების მხარდამჭერები ეგულება. ამის შესახებ ხაინდრავამ დღეს გამართულ პრესკონფერენციაზე განაცხადა და ნაციონალური მოძრაობის საარჩევნო კამპანიას სამეგრელოში, მიზანმიმართული პროვოკაცია უწოდა.

,,რატომ აირჩია რულოვსმა სამეგრელო? იმიტომ, რომ იქ ეგულება „ნაციონალების“ ბუდე – კოდუების, ახალაიების მხარდამჭერები, ასევე მეგის ქარდავების. იქ ეგულება მას დასაყრდენი. ვერ დავიჯერებ, რომ სანდრა რულოვსი საქართველოს პრობლემებმა შეაწუხა. დავიჯერო, რომ მის სამშობლოს ჰოლანდიას ან უკრაინას არ აქვს პრობლემები? ჩავიდეს თავის ქმართან, პრობლემები დღეს უკრაინას აქვს, თუ აქვს,“ - განაცხადა ხაინდრავამ.

გოგა ხაინდრავამ ქუთაისში ,,ქართული ოცნებისა“ და ნაციონალური მოძრაობის მაჟორიტარობის კანდიდატებზეც ისაუბრა და ადგილობრივებს გონივრული არჩევანის გაკეთებისკენ მოუწოდა.

,,კობა ნარჩემაშვილთან მე წლების წინ მქონდა პიროვნული დაპირისპირება, მაგრამ ამ ადამიანს ღირსება არ დაუკარგავს არც მაშინ და არც შემდგომ. იმ პერიოდის ხელისუფლებაში თუ ვინმეს ჰქონდა ღირსება, ეს იყო კობა ნარჩემაშვილი. ამ ყველაფრის ფონზე, როცა „რესპუბლიკელი“ თამარ კორძაია არჩევანს აკეთებს გიგი წერეთელზე, აღარ უნდა უკვირდეთ რესპუბლიკელებს ის შედეგი, რაც მიიღეს“, - განაცხადა ხაინდრავამ.

ხაინდრავამ ასევე ყურადღება გაამახვილა მთაწმინდის ოლქში დაგეგმილ არჩევნების მეორე ტურზეც.
,,სალომე ზურაბიშვილი არის ქალბატონი, რომელმაც გაიყვანა რუსული ტანკები საქართველოდან და ნიკა რურუა არის ადამიანი, რომელმაც შემოიყვანა რუსული ტანკები თავის პარტიასთან ერთად და 35 კილომეტრში დააყენა. რურუა არის წარსულის სიბნელე, სალომე ზურაბიშვილი და ევროპული იდეოლოგიის პოლიტიკოსი,“- აღნიშნა ხაინდრავამ.

მარი ნამგალაძე