პოლიტიკა

საპარლამენტო უმცირესობას დავით ბაქრაძე უხელმძღვანელებს

მე-9 მოწვევის პარლამენტში საპარლამენტო უმცირესობას დავით ბაქრაძე უხელმძღვანელებს, ვიცე-სპიკერი კი, სერგი კაპანაძე იქნება.

ამასთან, როგორც ”ნაციონალური მოძრაობიდან” არჩეული დეპუტატების შეხვედრის შემდეგ სერგი კაპანაძემ განაცხადა, გაირკვა, ,,ნაციონალური მოძრაობის’’ ფრაქციის თავმჯდომარე ნიკა მელია გახდება.

“გადაწყვეტილება, რაც მივიღეთ ეს იყო უმცირესობის ლიდერთან დაკავშირებით. ასევე ამ გუნდმა მე შემარჩია და ჩემთვის ძალიან დიდი პატივია, რომ ეს გუნდიც და ჩვენი ამომრჩეველიც წარმოვადგინო ვიცე-სპიკერის თანამდებობაზე და ასევე ფრაქციის ხელმძღვანელად შევჯერდით ნიკა მელია. დანარჩენი რამდენი ფრაქცია გვექნება, კომიტეტები და კომისიები, გვეცოდინება ხუთშაბათს,“-განაცხადა სერგი კაპანაძემ.

ამასთან, ადამიანის უფლებათა დაცვის კომიტეტში ოპოზიციის კვოტით გათვალისწინებულ თანამდებობაზე ,,ნაციონალური მოძრაობა’’ სავარაუდოდ გიორგი ტუღუშს წარადგენს.

რაც შეეხება სხვა კომიტეტებს, პარტიაში კონსულტაციები კვლავაც გრძელდება.

ნინო ექვთიმიშვილი