პოლიტიკა
საქართველო სწორ გზას მიუყვება - სებასტიან კურცი
საქართველოს საგარეო საქმეთა მინისტრმა, მიხეილ ჯანელიძემ და ეუთო-ის მოქმედმა თავმჯდომარემ, ავსტრიის რესპუბლიკის ევროპის, ინტეგრაციისა და საგარეო საქმეთა ფედერალურმა მინისტრმა სებასტიან კურცმა ერთობლივი პრესკონფერენცია გამართეს. მათ ილაპარაკეს იმ თემებზე, რომელიც შეხვედრაზე განიხილეს.
სებასტიან კურცმა მიულოცა საქართველოს ევროპასთან უვიზო მიმოსვლის შემოღება და განაცხადა, რომ საქართველო „სწორ გზას მიუყვება“.
მიხეილ ჯანელიძემ ხაზი გაუსვა ავსტრიასთან მეგობრულ ურთიერთობებსა და სებასტიან კურცის ძალისხმევას ეუთო-ს სამუშაო პროგრამაში საქართველოს საკითხის ერთ-ერთ წამყვან პრიორიტეტად განსაზღვრისათვის.
„უაღრესად ვაფასებთ, ავსტრიის მთავრობის მტკიცე და თანმიმდევრულ მხარდაჭერას საქართველოს ტერიტორიული მთლიანობის დაცვისა და ჩვენი ქვეყნის ევროპული ინტეგრაციის პროცესში“,-აღნიშნა მიხეილ ჯანელიძემ.
თავის მხრივ, ორმხრივი ურთიერთობებზე საუბრისას სებასტიან კურცმა კიდევ ერთხელ აღნიშნა საქართველოში ავსტრიის რესპუბლიკის საელჩოს გახსნის მნიშვნელობა. მისი თქმით, ის ხელს შეუწყობს სხვადასხვა სფეროში ორმხრივი თანამშრომლობის განვითარებას.
აგრეთვე კურცმა გაამხვილა ყურადღება საქართველოსთან ეკონომიკური თანამშრომლობის პერსპექტივაზე.
„დიდი პოტენციალია ეკონომიკურ ურთიერთობებში - ენერგეტიკის, ტურიზმის სფეროში, რაც ფეხდაფეხ წინ მიიწევს. ავსტრიული კომპანიები, რომლებიც საქართველოში საქმიანობენ, კმაყოფილი არიან აქ არსებული ვითარებით“-განაცხადა კურცმა.
შეხვედრაზე საუბარი შეეხო საქართველო-ეუთოს თანამშრომლობის საკითხებს. ქართული მხრიდან კიდევ ერთხელ აღინიშნა ეუთოს ჩართულობის მნიშვნელობა, როგორც რუსეთ-საქართველოს კონფლიქტის მშვიდობიანი მოგვარების პროცესში, ასევე ეუთოს მონაწილეობა ომით დაშორიშორებულ მოსახლეობას შორის ნდობის აღდგენის მექანიზმის ეფექტური განხორციელებისათვის.
მხარეებმა ასევე განიხილეს საქართველოს ოკუპირებულ ტერიტორიებზე უსაფრთხოების, ადამიანის უფლებებისა და ჰუმანიტარული კუთხით არსებული მძიმე მდგომარეობა.
ეუთო-ს მოქმედი თავმჯდომარე თბილისში ვიზიტის ფარგლებში შეხვედრებს გამართავს საქართველოს პრეზიდენტთან და პრემიერ-მინისტრთან. მინისტრი დაესწრება ინციდენტების პრევენციისა და მათზე რეაგირების მექანიზმების შეხვედრას ერგნეთში და ეწვევა იძულებით გადაადგილებულ პირთა დასახლებას შავშვებში.
ანა მებურიშვილი