პოლიტიკა

საქართველოში ძალიან ბევრი ადამიანი ელოდება სამართალს - ანა ნაცვლიშვილი

პრეზიდენტის საპარლამენტო მდივნის, ანა ნაცვლიშვილის განცხადებით, ხალხის პროტესტი იმან განაპირობა, რომ სახელმწიფო მათი უფლებების დაცვას ვერ უზრუნველყოფს.

„თავს ნუ მოვიტყუებთ, ეს ერთადერთი შემთხვევა არ არის, საქართველოში ძალიან ბევრი ადამიანი ელოდება სამართალს და სახელმწიფო მათი უფლებების დაცვას ვერ უზრუნველყოფს. სწორედ ამან გამოიყვანა ხალხი ქუჩაში. ძალიან რთულია შვილმოკლული მშობლის ყურება და ამ ვითარების ატანა“, - დასძინა ნაცვლიშვილმა ჟურნალისტებთან საუბრისას.

მან აღნიშნა, რომ საზოგადოების მოთხოვნა სისტემური ცვლილებების შესახებ სრულიად ლეგიტიმურია.

დღეს საქართველოს პრეზიდენტი გიორგი მარგველაშვილი უშუალოდ ესტუმრა ზაზა სარალიძეს რუსთაველზე გაშლილ კარავში. შეხვედრა დაახლოებით ერთი საათის განმავლობაში მიმდინარეობდა. მარგველაშვილთან ერთად სარალიძესთან მივიდნენ პრეზიდენტის ადმინისტრაციის წარმომადგენლები.