საზოგადოება

საქართველოში რუსეთის საპატრიარქოს ოფიციალური წარმომადგენელი ილია მეორეს წარუდგინეს - რუსეთის საპატრიარქო

რუსეთის საპატრიარქოს წარმომადგენელი დეკანოზი ვლადიმერ ალექსანდროვი საქართველოში ჩამოვიდა.

რუსეთის საპატრიარქოს ინფორმაციით, 4 ივნისს საქართველოს საპატრიარქოში გამართულ შეხვედრაზე მოსკოვის პატრიარქატის საგარეო საეკლესიო კავშირების განყოფილების თავმჯდომარემ მიტროპოლიტმა ილარიონმა ალექსანდროვი ოფიციალურად წარუდგინა საქართველოს კათოლიკოს პატრიარქ ილია მეორეს. მას ესწრებოდა რუსეთის დელეგაციის კიდევ ორი წარმომადგენელი.

თვითონ საქართველოს საპატრიარქოს მიერ გავრცელებულ ინფორმაციაში არაა საუბარი ალექსანდროვის ჩამოსვლაზე.

„დღეს საქართველოს საპატრიარქოს ერთდღიანი ვიზიტით ეწვია რუსეთის ეკლესიის საგარეო ურთიერთობათა განყოფილების თავმჯდომარე, მიტროპოლიტი ილარიონ (ალფეევი), ორ თანმხლებ პირთან ერთად. სტუმრობის მიზანი იყო უკრაინის ეკლესიის გარშემო ბოლო დროს განვითარებულ მოვლენებთან მიმართებაში რუსეთის ეკლესიის პოზიციის გაცნობა.

უახლოეს პერიოდში, ამ საკითხთან დაკავშირებით საქართველოს ეკლესიას ეწვევა მსოფლიო საპატრიარქოს წარმომადგენლობა“, -წერია საქართველოს საპატრიარქოს განცხადებაში.

14 მაისს რუსეთის მართლმადიდებელი ეკლესიის წმინდა სინოდის სხდომაზე მიიღეს გადაწყვეტილება ალექსანდროვის საქართველოში გაგზავნის შესახებ, რომელიც შეთახნმებული იყო საქართველოს მართლმადიდებელ ეკლესიასთან.

დეკანოზი ვლადიმერ ალექსანდროვი თბილისში იოანე ღვთისმეტყველის სახელობის ტაძარში რუსულენოვანი მრევლისთვის იმსახურებს. ასევე ცნობილია, რომ საჭიროების შემთხვევაში ალექსანდროვს რუსეთის მართლმადიდებელი ეკლესიის პოზიციის წარდგენა დაევალება.