საზოგადოება

სექტემბრიდან ბავშვებში სისხლში ტყვიის შემცველობასთან დაკავშირებით დიდი კვლევა ჩატარდება - ამირან გამყრელიძე

დაავადებათა კონტროლის ცენტრის დირექტორის ამირან გამყრელიძის განცხადებით, სექტემბერში საქართველოში ბავშვებში სისხლში ტყვიის შემცველობასთან დაკავშირებით დიდი კვლევა ჩატარდება.

„სექტემბრიდან გაერო-ს ბავშვთა ფონდთან და იტალიის ჯანდაცვის ინსტიტუტთან ერთად ტარდება დიდი კვლევა ბავშვებში. ეს მოგვცემს, თუ რასთან გვაქვს საქმე ქვეყანაში. აქამდე ჩატარებული კვლევები მხოლოდ ცალკეულ ჯგუფებზე იყო, ხოლო მთლიანად ქვეყანაში რა ხდება და მტკიცებულებაზე დაფუძნებული ინფორმაცია წლის ბოლოს, ამ კვლევის შემდეგ გვექნება", - განაცხადა გამყრელიძემ სემინარზე „ბავშვებსა და მოზარდებში სისხლში ტყვიის შემცველობის შეფასება“.

მისივე თქმით, ცალკეულ ჯგუფებში ჩატარებული მცირე კვლევები გვიჩვენებს, რომ ზომიერი მატებაა 2-დან 5 წლამდე ასაკის ბავშვებში, დაახლოებით 15%-დან 20%- ის ფარგლებში.

გამყრელიძის ინფორმაციით, ქვეყანაში ამ კუთხით საგანგაშო სიტუაცია არაა.

„საგანგაშო არ არის. საყურადღებო სურათია ქვეყანაში ტყვიასთან მიმართებით. აუცილებელია გავაანალიზოთ, რაც გვაქვს, დავგეგმოთ, რას ვაკეთებთ და შემდეგ შესაბამისი გადაწყვეტილებები მივიღოთ. დღევანდელი შეხვედრა ეძღვნება ამ საკითხს“, -თქვა გამყრელიძემ.