პოლიტიკა

სერგი კაპანაძე ხელისუფლებას ხორავას ქუჩის საქმის შემსწავლელი საგამოძიებო კომისიის მიერ მიღებული დასკვნის შესრულებისკენ მოუწოდებს

ხორავას ქუჩაზე მოზარდების მკვლელობის საქმის შემსწავლელი დროებითი საგამოძიებო კომისიის თავმჯდომარემ, „ევროპული საქართველოს“ წევრმა სერგი კაპანაძემ ხელისუფლებას კომისიის მიერ დამტკიცებული 32 რეკომენდაციის შესრულებისკენ მოუწოდა.

კაპანაძემ მიმართა მთავრობას, შეასრულოს ყველა ის რეკომენდაცია, რომელიც კომისიის სხდომაზე გუშინ დამტკიცდა. კაპანაძის განცხადებით, ეს დასკვნა უკვე ძალაშია და ახლა ხელისუფლებაზეა დამოკიდებული, დასკვნის შესრულებით რამდენად უპასუხებს საზოგადოებაში არსებულ კითხვებს.

„რაც იყო შესაძლებელი, კომისიამ დაადგინა და გამოკვეთა. ის მანდატი, რომელიც გვქონდა, რომ ობიექტური ჭეშმარიტება დაგვედგინა ამ საქმეზე, შეასრულა. ეს დასკვნა უკვე არის მიღებული კომისიის მხრიდან და უკვე არის ძალაში. შესაბამისად, ეს დასკვნა უკვე არის შესასრულებელი ხელისუფლების მხრიდან. ხელისუფლება შეასრულებს თუ არა ამ დასკვნას, იმეტყველებს პირდაპირ იმაზე, აიღებს თუ არა პასუხისმგებლობას იმაზე, რაც მოხდა პირველ დეკემბერს.

დასკვნას მეტი აღარანაირი ლეგიტიმაცია აღარ სჭირდება. ის იქნება წარდგენილი ბიუროსთვის და პარლამენტის სესიისთვის უახლოეს ხანში. ბიუროს გაეგზავნება დღეს და უახლოეს სესიაზე იქნება განხილული. იქნება ასევე პოლიტიკური დისკუსია, მაგრამ დასკვნა არის მიღებული, არის ერთი დასკვნა და არის ძალაში. ჩვენ ველოდებით, რომ ხელისუფლება გადადგამს ქმედით ნაბიჯებს და იმ რეკომენდაციებს, რომელიც არის გაცემული ჩვენს დასკვნაში. ჯამში არის 32 რეკომენდაცია. ველოდებით, რომ მათ შეასრულებს და ამგვარად უპასუხებს როგორც საზოგადოებას და იმ მოთხოვნებს, რომელიც საზოგადოებას გაუჩდა, ისე დაზარალებულების ოჯახებს“, – განაცხადა კაპანაძემ.

დეპუტატის თქმით, კომისიის გუშინდელ სხდომაზე გადაწყდა, რომ საქართველოს შინაგან საქმეთა მინისტრმა და მთავარმა პროკურორმა პარლამენტს ერთი თვის ვადაში უნდა წარუდგინონ ანგარიში, რამდენად სრულდება კომისიის რეკომენდაციები.

„ევროპული საქართველოს“ მიერ მომზადებულ დასკვნაში საუბარია შს და იუსტიციის მინისტრების პოლიტიკურ პასუხისმგებლობაზე. ასევე, დასკვნის თანახმად, უნდა დადგეს იმ ადამიანების პასუხისმგებლობის საკითხი, რომლებიც ამ გამოძიების პროცესში იყვნენ ჩართულები. საგამოძიებო კომისიის მიერ დამტკიცებულ დასკვნაში ასევე არის მოთხოვნა, დაიწყოს სამართლებრივი დევნა მ.კ-ის მიმართ დავით სარალიძის ჯგუფურად განზრახ მკვლელობაში თანამონაწილეობის მიმართულებით, ასევე მირზა სუბელიანის მიმართ უფლებამოსილების ბოროტად გამოყენების მუხლით.