სამართალი
შეიქმნება ახალი დაწესებულება,რომელიც მსჯავრდებულებს გათავისუფლებისთვის მოამზადებს - ალექსანდრე დარახველიძე
საქართველოს პარლამენტი სასჯელაღსრულების და პრობაციის სამინისტროს მიერ მომზადებული კანონპროექტის განხილვას იწყებს, რომელიც მსჯავრდებულთათვის გარკვეულ სიახლეებს გულისხმობს.
კერძოდ, საუბარია იმაზე, რომ სასჯელის ერთ-ერთი სახე შინაპატიმრობა იყოს; ასევე კანონპროექტის მიხედვით, იცვლება მსჯავრდებულის მიერ უმაღლესი განათლების მიღების წესი; საპატიმროდან გათავისუფლებამდე კი, მსჯავრდებულებს მოამზადებენ; ასევ ქალი პატიმრებისთვის შაბათ-კვირას სახლში წასვლის შესაძლბელობა იქმნება და სხვა.
სასჯელარსრულების სამინისტროს იურიდიული დეპარტამენტის ხელმძღვანელმა ალექსანდრე დარახველიძემ მედიასთან საუბარში განმარტა, თუ რას გულისხმობს გათავისუფლებამდე პატიმრების მომზადების წესი.
მისი თქმით, სიახლე შეეხებათ იმ პატიმრებს, რომლებსაც სასჯელაღსრულების დაწესებულებაში დარჩენის მხოლოდ ექვსთვიანი ვადა აქვთ.
მისი თქმით,შემოთავაზებული კანონპროექტის მთავარი მიზანი მსჯავრდებულთა რესოციალიზაცია- რეაბილიტაცია და მათი საზოგადოებაში ეფექტური დაბრუნებაა.
„მნიშვნელოვან სიახლეს წარმოადგენს ახალი დაწესებულების შექმნა - ეს არის „გათავისუფლებისთვის მომზადების-თავისუფლების აღკვეთის დაწესებულება“, რომელიც მოამზადებს იმ მსჯავრდებულებს, რომელთა დარჩენილი სასჯელი არ აღემატება 6 თვეს და მათი საშიშროება არის დაბალი, ან საშუალო. ასეთი ტიპის მსჯავრდებულები გადავლენ სპეციალურ დაწესებულებაში, რომელიც შეიძლება იყოს სხვა დაწესებულების ტერიტორიაზე და ცალკე შეიქმნას ეს დაწესებულება. აქ სწავლისა და შრომის მიზნით, მათ საშუალება ექნებათ დეპარტამენტის დირექტორის მიერ განსაზღვრული პერიოდულობით, დატოვონ დაწესებულება, რომ მოიგვარონ ის პრობლემები, რომელიც პენიტენციალურ სისტემაში ყოფნამ გამოიწვია და შემდგომში დაბრუნდნენ, რათა ამ 6 თვის თავზე გათავისუფლებას შეხვდნენ მომზადებულები. გარდა ამისა, ეს დაწესებულება მოგვცემს საშუალებას, რომ თავიდან ავირიდოთ განმეორებითი დანაშაულის ჩადენის რისკი“,-აღნიშნა დარახველიძემ.
მონიკა დავლიანიძე