პოლიტიკა

შეწყვიტეთ საკონსტიტუციო პროექტის მიღების პროცესი - გიორგი აბაშიშვილი მმართველ გუნდს

პრეზიდენტის ადმინისტრაციის ხელმძღვანელმა გიორგი აბაშიშვილმა მოუწოდა საპარლამენტო უმრავლესობას, შეწყვიტოს საკონსტიტუციო პროექტის მიღების პროცესი და განაახლოს მოლაპარაკებები ოპოზიციასთან კონსესუსის მისაღწევად.

აბაშიშვილმა აღნიშნა, რომ თუ მმართველი გუნდი მათ რჩევას არ გაითვალისწინებს, ახალ კონსტიტუციას შეექმნება ლეგიტიმაციის პრობლემა.

„ჯერ კიდევ გასული წლის ნოემბერში ვამბობდით, რომ კონსტიტუციის მიღება კონსენსუსის გარეშე იყო შეუძლებელი, წარმოუდგენელი და ასეთი ტიპის კონსტიტუციას ექნებოდა ლეგიტიმაციის პრობლემა, შესაბამისად, ჩვენ მოვუწოდებთ მმართველ პოლიტიკურ გუნდს დაუყოვნებლივ შეწყვიტოს პროცესი საქართველოს პარლამენტში. ვგულისხმობთ კონსტიტუციის მიღების პროცესს, განეწყოს კონსენსუსისთვის და დაუბრუნდეს მოლაპარაკებებს. კიდევ ერთხელ გავიმეორებ, რასაც 9-10 თვის წინ ვამბობდით, რომ ფართო კონსენსუსის გარეშე საქართველოს კონსტიტუციას ექნება სერიოზული ლეგიტიმაციის პრობლემა“, - განაცხადა აბაშიშვილმა.

დღეს მმართველმა გუნდმა უარი თქვა სტრასბურგში დაგეგმილ შეხვედრაზე მონაწილეობის მიღებაზე. საპარლამენტო უმრავლესობამ შეხვედრის ჩაშლაში ოპოზიცია დაადანაშაულა. მისი აზრით, ოპოზიციამ დიალოგი ჩიხში შეიყვანა.

შეგახსენეებთ, ვენეციის კომისიის თავმჯდომარემ ჯანი ბუკიკიომ ქართულ ოპოზიციურ პარტიებსა და მმართველ გუნდს 6 სექტემბერს, სტრასბურგში დაპატიჟა საკონსტიტუციო ცვლილებებზე სამსჯელოდ.

ანა მებურიშვილი